Өчигдөр орой "Улаан бал" товч тойм нэвтрүүлгээр МУГТ Э.Цэндбааратын бусдад зүй бусаар зодуулж буй бичлэг цацагдав. Учир нь түүнийг ДАШТ-ий сорилын өмнө согтууруулах төрлийн ундаа хэрэглэсэн хэмээн МБХ-ноос хариуцлага тооцож Үндэсний шигшээ багаас хассан юм.
Мөн "Улаан бал" товч тойм нэвтрүүлгийн дараа МҮОХ-ны Ерөнхий нарийн бичгийн дарга, Олимпын аварга Э.Бадар-Ууган өөрийн цахим хуудаснаа тайлбар хийгээд байгаа билээ.
Тэгвэл сэтгүүлч, хөтлөгч Ч.Лодойсамбуу мөн цахим хуудаснаа дараах тайлбарыг бичсэн байна.
Тэрээр "Боксчин бол боксчин. Боксчин боксоо л сайн тоглож байвал бусад нь хэнд, ямар хамаатай вэ? Ер нь тэд бидний нүдэнд “эвтэйхэн” харагдаж амьдрах өртэй юу? Хэнд ч түвэг удаагүй нэгнийхээ хэв шинжийг мухар төсөөлөлдөө багтааж ядан сайхан муухай, зөв бурууг нь тодорхойлоод чичилж суудаг бид хэн юм бэ? Эрхийг нь дэвсэлж эрхээ эдлэх эрх хэнд ч байхгүй биз?
Бэлтгэл тасалдаг, тэгдэг ингэдэг л гэнэ. Тийм байж. Тэр адгийн муу чинь тэгэж замарч яваад, дээр нь жингээ тултал хасч очоод Олимпын аваргын босгонд тулж байна. Шигшээд байх эрхгүй юу? Ялагдлын шалтгаанд ч тэр ганцаараа чичлүүлэх ёсгүй.
Тамирчны чадвар, номхон байдал хоёрын аль нь чухал юм бэ? Та нар тамирчин болохоос санваартан биш. Бусдад сайхан харагдах үүрэггүй. Тулаанаа л сайн хийх ганц үүрэгтэй. Хуулийн дор, нэгэндээ, нийгэмдээ л гай тарихгүй бол тэр хүн ямар ч байх эрхтэй. Одоогоор Олимпын аварга ганц боксчин бий. Тэр хүн би бол сайн хүү байсаан л гэх утгатай үг олон хэлнэ лээ. Үнэн ч байх. Гэхдээ чамд сайн дасгалжуулагч, багш нар байсан. Одоо тэнгэрт байгаа. Цэндбаатарт байхгүй. Өөртэйгөө битгий жиш. Ухаантай бай.
Та нар багшийнхаа үгнээс зөрөх бүү хэл нүүр тулахад л харц чинь гулгаж унадаг байсан биз. Жинхэнэ багш, дасгалжуулагч хүн тэгэж л хүндлэл хүлээдэг. Тамирчнаа адуу шиг номхруулж биш хүн шиг хандаж, харьцаж, ойлгож тусалдаг. Тэрнээс хүндэлсэнгүй гээд хөөж туудаггүй юм. Та нар энэ маягаараа “номхон” биш ч өчнөөн олон авьяасыг нам дарах юм байна. Ямар ч галзуу, сагсуу хүн хүндэлдэг хүнийхээ өмнө шалчийдаг л юм. Тамирчинд биш та нарт асуудал байна. Хийсэн тайлбарууд чинь асуудлын шалтгааныг эрэлхийлсэн ажил хэрэгч биш арьсаа хамгаалсан арчаагүй шинжтэй байна шүү. Би байгаагүй ч гэх шиг" гэсэн юм.
