Өчигдөр орой Боксын холбооны Удирдах зөвлөл шуурхай хуралдаж Үндэсний шигшээ багийн тамирчин, Гавьяат Э.Цэндбаатарыг Үндэсний шигшээ багаас хөөх шийдвэр гаргажээ.
Э.Цэндбаатар Токио-2020 зуны XXXII дахь олимпын наадамд тавдугаар байр эзэлсэн бөгөөд Аравдугаар сард Серби улсад болох ДАШТ-д Монголыг төлөөлж оролцох өндөр магадлалтай тамирчин байсан юм.
Түүнийг удаа дараагийн сахилга, хариуцлага алдсан учраас ийнхүү удирдах зөвлөлийн гишүүдийн зуун хувийн саналаар хассан байна.
Үүнтэй холбогдуулан Монголын боксын холбооноос өнөөдөр 10 цагт хэвлэлийн хурал зарлажээ.
Харин дээрх шийдвэрийн дараа МУГТ Э.Цэндбаатар өөрийн цахим хуудаснаа “Өнөөдөр би Дэлхийн аваргадаа орно гээд бэлтгэлээ хийж байсан. Одоо бэлтгэл хийх шаардлага байхгүй. Монголдоо ч байх шаардлага алга. Би хэнд ч гомдохгүй ээ, хэлэх гэсэн зүйлээ хэлнэ” гэжээ.
Дашрамд, Э.Цэндбаатар өмнө нь нүцгэн хотын гудамжаар хашхирч яваад цагдаагийн албан хаагчдад саатуулагдаж байсан билээ. Тэрээр алдаагаа засахгүй саяхан мөн л согтуурсан үедээ бусдад зодуулсан гэх бичлэг хийж олон нийтэд цацсан юм.