Сүүлийн 24 цагийн хугацаанд улсын хэмжээнд коронавируст халдварыг илрүүлэх зорилгоор хийсэн шинжилгээнүүдээс 1,453 хүний сорьцод халдвар илэрч, нийт бүртгэгдсэн тохиолдол 179,894 болж нэмэгджээ. Шинээр илэрсэн тохиолдлууд бүгд дотоодын халдвар бөгөөд

• 343 нь нийслэл хотод,
• 1,110 нь орон нутагт бүртгэгджээ.

Мөн хугацаанд 1,960 иргэн эдгэрч, эмнэлгийн болон гэрийн ажиглалтаас гарсан байна.

Харин коронавируст халдварын улмаас орон нутагт 61-80 гаруй насны хоёр хүн нас баржээ. Өнөөдрийн байдлаар уг өвчний хүндрэлээр нийтдээ 871 хүн эндээд байна.

Коронавируст халдварыг илрүүлэх шинжилгээгээр эерэг гарсан нийт тохиолдлын 10-20 хувийг, гадаадаас ирсэн иргэдээс эерэг гарсан бүх тохиолдлыг муцац илрүүлэх шинжилгээнд хамруулжээ. Долоо хоногийн хугацаанд 369 сорьцоос 39-д нь буюу 11.6 хувьд нь дельта хувилбар тодорхойлогдсон байна.

Япон улсад хийгдэж байгаа мутац илрүүлэх шинжилгээнд 38 сорьц явуулж шинжлүүлэхэд 

• Альфа-32 /82.3 хувь/
• Монголд үүссэн мутац-4 /10.5 хувь/
• Дельта-2 /5.2 хувь/ эзэлсэн байна. 

Энэ 38 сорьцыг долдугаар сарын 16-наас өмнө илгээсэн бөгөөд түүнээс хойш хугацаанд нийт эерэг тохиолдлуудад Дельта хувилбарын эзлэх хувь 10 орчим болж нэмэгджээ. Ялангуяа орон нутагт тухайлбал бүсийн наадам хийсэн аймгуудад Дельта хувилбарын халдвар нэмэгдэх эрсдэл үүсээд байгааг ХӨСҮТ-ийн захирал Л.Баттөр мэдээллээ.

Дельта вирусийн халдварыг давамгайлах хэмжээнд хүргэхгүйн тулд хил дээр хатуу хяналт тавьж байгаа ч орон нутагт халдвар тархах эрсдэл үүсчихлээ. Энэтхэгт үүссэн Дельта хувилбар тус улстай шууд нислэг ихтэй орнуудад хамгийн түрүүнд тархаж, давамгайлах халдвар болсон зүй тогтол ажиглагдсаныг Эрүүл мэндийн сайдын зөвлөх О.Батбаяр онцоллоо.