Хэдхэн сарын, хэдхэн хоногийн өмнө АН-ын дарга болно, АН-аас Ерөнхийлөгчид нэр дэвшинэ хэмээн намынхнаа хуйлруулж байсан Ц.Оюунгэрэл гишүүн асан хоёр удаагийн сунгаанд ялагдсаныхаа хариуг намын дарга нараасаа хатуухан авахаар шийдсэн бололтой.
Ерөнхийлөгчийн сонгуульд нэр дэвшихээр нам дотроо өрсөлдөж байхдаа "Амьдралын минь хамгийн үнэ цэнэтэй зүйл АН минь билээ" хэмээн уянгалж байсан улстөрч эмэгтэй сунгаанд ялагдангуутаа АН-аас гарахаар болов. Тэр тусмаа сонгууль хаяанд ирж, 29 жил зүтгэсэн нам нь хоёр хуваагдчихаад хэзээ мөдгүй тасар татагдахад бэлэн болчихоод байгаа энэ үед.
Мөн түүний хувьд намаасаа гарахаас илүүтэй гарч байгаагаа олон нийтэд зарлах нь туйлын зорилго байсан бололтой. Эхний удаад "АН-ын үйл хэрэгт дахиж хэзээ ч оролцохгүй" хэмээн зарлаж, оронд нь залуучуудын улс төрийн боловсролыг дэмжиж ажиллахаа мэдэгдсэн. Өнгөрөгч долоо хоногт "Өдрийн сонин"-д өгсөн ярилцлагадаа "Ерөнхийлөгчийн сонгууль, улс төрийн марафон дууссаны дараа ажлаа эхлүүлнэ. Үүний тулд залуучуудад зориулсан, улс төрөө зөв хийх намын шинэ дүрмийг бичиж байгаа" тухайгаа ярицлага өгсөн билээ.
Гэвч гишүүн асан маань сонгуулийн дүн гарахыг хүлээж тэссэнгүй бололтой. Түүнээс өмнө амжиж хийх ёстой ажил гарсан бололтой. Тодруулбал, Ц.Оюунгэрэл гишүүн асан өнөөдөр АН-аас гарч буйгаа албан ёсоор зарлалаа. Харин намаас гарсны дараа ямар сонголт хийх тухайд өнөө орой лайваар мэдээлнэ гэв.
Уг нь бол Ц.Оюунгэрэл гэдэг нэг л хүн. Уг хүний АН-аас гарах, орох, эсхүл шинээр нам байгуулах гэх мэт улс төрийн эрх ч гэсэн чөлөөтэй. Гэвч АН-ын хувьд хамгийн хүнд, эгзэгтэй ийм үед нэг ч гэсэн намын лидер намаас гарах, түүнийгээ ингэж ил тод зарлах нь тус намын рейтингэд улам л муугаар нөлөөлнө. Ядаж л Ц.Оюунгэрэлийг дагаж, үйл хэрэг, үзэл бодолд нь итгэж үнэмшиж байсан жирийн гишүүдийн урам зориг алга болно. Дээр нь өрсөлдөгч намынх нь хувьд амттайхан өгөөш ч болох биз.
Хамгийн гол нь Ц.Оюунгэрэл мундаглаад сонгуулийн өмнө шинэ нам байгууллаа гэхэд тэнд нь МАН-ыг биш, АН-ыг харж, дэмжиж явсан залуус л цугларна. Намынхаа нэр дэвшигчийн авч чадах байсан нэг, хоёр саналаас зулгаана л гэсэн үг. Хэрэв тийм биш байсан бол өнөөдөр ийм сонголт хийх өөр шалтгаан байсан уу? Ц.Оюунгэрэлийн хувьд холын том зорилгоо бодсон гэж болох ч АН-ын хувьд сарын дараа болох сонгуулийн үр дүн аминаас илүү үнэтэй болсон цаг. Ийм чухал үед Ц.Оюунгэрэл гишүүн асан "гарман дээр морио юүлж", намаа нэгмөсөн хорлохоор шийдсэн бололтой.
Сэтгэгдэл (16)