“Монгол Улсад эмчлэгдэх боломжгүй өвчин” бодлогын хүрээнд дэвшилтэт технологи нэвтрүүлэх, хүний нөөцийг бэлтгэх зорилгоор Улсын хоёрдугаар төв эмнэлгийн (УХТЭ) таван эмчээс бүрдсэн баг БНХАУ-ын Шанхай хотод “Зүрхний титэм судасны хүнд хэлбэрийн нарийсал, судасны дисплази эмчилгээ”-ний чиглэлээр мэргэшиж, амжилттай суралцаад ирлээ.

Энэ сургалтын үр дүнд УХТЭ-ийн Зүрх судас судлалын тасгийн шигдээсний нэгж дэлхийд хүлээн зөвшөөрөгдсөн IVUS (дотуурх хэт авиан шинжилгээ) болон NIRS (ойрын инфра улаан спектроскопи) хосолсон дүрс оношилгооны технологийг амжилттай суурилуулж, ашиглалтад оруулсан байна. Энэ төхөөрөмж нь зүрхний титэм судасны нарийслыг өндөр нарийвчлалтай оношлох, оношид суурилсан эмчилгээ гүйцэтгэх боломжийг нээж байгаа юм.

Энэхүү дэвшилтэт технологийг нэвтрүүлснээр:

• Титэм судасны дисплази болон хүнд зэргийн нарийслыг Монгол Улсад олон улсын стандартын дагуу эмчлэх боломжтой болов.

• Нас баралт болон хүндрэлүүдийг бууруулах, эмчилгээг гадаадад хийлгэх шаардлагатай иргэдийн тоог багасгах бодит үр дүн гарна.

• Дотуурх мэс засал буюу PCI эмчилгээг нотолгоонд суурилан, илүү үр дүнтэй гүйцэтгэх нөхцөл бүрдэж байна.

Эмчилгээний үр дүнгийн хувьд, олон улсын ULTIMATE зэрэг судалгаагаар IVUS-ээр хянуулсан стент суулгалт нь зөвхөн ангиографид суурилсан аргыг бодвол 3 жилийн дотор зорилтот судасны бүтэлгүйтлийг 38–45 хувиар бууруулдаг болохыг тогтоосон. Мөн 22 рандомчлогдсон туршилтыг нэгтгэсэн мета-шинжилгээгээр IVUS болон OCT-д суурилсан эмчилгээ нь зүрхний шалтгаант нас баралт, дахин эмчилгээ шаардлагатай байдал зэргийг мэдэгдэхүйц бууруулж байжээ.

Энэ шинэ технологи нь зөвхөн УХТЭ бус, Монгол Улсын зүрх судасны оношилгоо, эмчилгээний салбарт шинэ шатны хөгжил эхлүүлж буй томоохон алхам юм.

Эх сурвалж: УХТЭ