Монгол Улсын Шадар сайдын 2025 оны нэгдүгээр сарын 29-ний 13 дугаар тушаалаар байгуулагдсан хамтарсан хяналт шалгалтын ажлын хэсэг хөдөө, орон нутаг болон нийслэлийн томоохон зах, худалдааны төв, сургууль, цэцэрлэг, хүнсний лабораториудад шалгалт хийж, илэрсэн зөрчлийн талаар мэдээлэл хүргэлээ.

Ажлын хэсэг Стандарт, хэмжил зүйн газар, Мал эмнэлгийн ерөнхий газар, Үндэсний итгэмжлэлийн төв болон Хүнсний аюулгүй байдлын үндэсний лавлагаа лабораториос бүрдсэн бөгөөд Шадар сайд С.Амарсайхан уг ажиллагааг чиглүүлэн удирдсан байна.

Шалгалтын гол илэрцүүд:

• Стандарт, хэмжил зүйн газар: Үнэт металл, электрон жин, сорьцын баталгаатай холбоотой зөрчлийг 140 орчим иргэн, ААН-д газар дээр нь арилгуулсан. Импортын үнэт эдлэлийн сорьцын тэмдэггүй, шаардлага хангаагүй мөнгөн аяга худалдаалсан зөрчил илэрсэн.

• Үндэсний итгэмжлэлийн төв: Худалдааны төвүүдэд хүнсний бүтээгдэхүүн, махны чанар, лабораторийн чадавхи, итгэмжлэлийн түвшинг шалгахад зарим лаборатори стандартын шаардлага хангаагүй, тоног төхөөрөмж дутмаг байжээ.

• Хүнсний лавлагаа лаборатори:

  • Жимс, хүнсний ногоо: 79 дээжээс 28-д пестицид илэрсэн

  • Хиамны цех: 22 дээжээс 8-д нитрит, давс, колиформын хэтрэлтэй

  • Үр тариа: 20 дээжийн 12 нь хог ургамал, шавж, хачигтай байжээ

• Боловсролын байгууллагууд: Сургууль, цэцэрлэгийн хоол үйлдвэрлэл, ундны ус, агаарт хийсэн шинжилгээгээр эрүүл ахуйн дэглэм хангаж буй эсэхийг шалгасан. Илчлэг хэмжээ болон хоолны аюулгүй байдалд хяналт тавьсан.

Цаашид Говьсүмбэр, Дорноговь аймгуудад мөн Замын-Үүд боомт дээр хяналт шалгалтыг үргэлжлүүлэн, мах, хүнсний ногооны аюулгүй байдлыг лабораторийн түвшинд шалгах юм. Мөн Замын-Үүдийн гаалиар орж ирж буй мах, махан бүтээгдэхүүнд тусгай хяналт тавих төлөвтэй байна.

Одоогийн байдлаар Монгол Улсад 6670 гаруй стандарт хүчин төгөлдөр мөрдөгдөж байгаа бөгөөд үүний 10 хувь нь хүнсний салбарт хамаарч байна. Тиймээс энэхүү чиглэлд стандартын шинэчлэл, хэрэгжилтэд анхаарахыг холбогдох байгууллагууд онцолж байна.

Эх сурвалж: Стандарт, хэмжил зүйн газар