Улаанбаатар хотын Захирагчийн ажлын албанаас “Шарилжгүй Улаанбаатар” тав дахь удаагийн аяныг өчигдрөөс эхлүүллээ.

2016 оноос жил бүр зохион байгуулж буй уг аян хоёр үе шаттай. Нэгдүгээр үе шат 2020 оны 07 сарын 16-30-нд, хоёрдугаар үе шат 2020 оны 08 сарын 10-25-нд болно. Аяны хүрээнд хөл газрын ургамал дохиураа гүвэхээс өмнө болон бүрэн нахиалсны дараа хадах юм.

Нийтийн эзэмшлийн гудамж зам талбай, далан, гуу жалга, орон сууц, гэр хороолол дунд, эмнэлэг, сургууль цэцэрлэг, аж ахуйн нэгж, байгууллагын хашаанд ургасан шарилж зэрлэг ургамлыг устгах бөгөөд УБЗАА-наас ажил эрхэлдэггүй 136 иргэнийг ажлын байраар ханган, хөдөлмөр хамгаалалын иж бүрэн хувцас, хэрэглэл, автомат хадуур зэрэг багаж хэрэгслээр хангаж өдрийн хоол, урамшууллыг шийдвэрлэсэн байна.

Дашрамд дурдахад, 2019 онд 4.2 сая мкв талбайн шарилж, лууль, зэрлэг ургамлыг цэвэрлэж устгасан бөгөөд энэ онд 4.8 сая мкв талбайн шарилж, зэрлэг ургамлыг цэвэрлэж, устгахаар төлөвлөж байна.