2019 он гарснаас хойш Хар тамхитай тэмцэх газар 59 холбогдогчтой, 24 хэргийг илрүүлэн, мөрдөн шалгах ажиллагаа үргэлжлүүлж байна гэж Цагдаагийн ерөнхий газраас мэдээллээ.

Гаалийн ерөнхий газрын олон улсын шуудан илгээмжийн газартай хамтран шинэ төрлийн урсгал шуудан илгээмжээр мансууруулах эм, сэтгэцэт нөлөөт бодисыг улсын хилээр нэвтрүүлсэн таван хэргийг илрүүлэн таслан зогсоох арга хэмжээ аван ажиллажээ. 

Мөн өчигдөр Цагдаагийн ерөнхий газрын Хар тамхитай тэмцэх газраас 19-32 насны 1 эмэгтэй, 2 эрэгтэй, гурван этгээд 500 сая орчим төгрөгийн үнийн дүнтэй метамфетамин /мөс/ төрлийн хүчтэй сэтгэцэд нөлөөтэй бодисыг тээвэрлэн Сүхбаатар дүүргийн нутаг дэвсгэрт явж байхад нь илрүүлэн, таслан зогсоож мансууруулах эм, сэтгэцэт нөлөөт бодисыг эд мөрийн баримтаар тооцон хураан авч, хэрэг бүртгэлтийн хэрэг нээн саатуулан шалгаж байгаа аж. Уг илгээмжийг дээрх этгээдүүд АНУ-аас захиалан авсан бөгөөд гаалийн хяналт шалгалтын явцад мансууруулах бодисыг илрүүлсэн байна. Гаалийн байгууллагын эрх хэмжээний хүрээнд гаалийн хяналтын бүс дотор сэжиг бүхий зүйл илэрвэл холбогдох хуульд заасан арга хэмжээг хэрэгжүүлээд харьяаллын дагуу хуулийн байгууллагад шилжүүлэх үүрэгтэй байдаг байна. Мөрдөн шалгах ажиллагаа харьяаллын дагуу цагдаагийн байгууллагад хийгдэж байна.

Хар тамхи хэрэглэдэг, худалдан борлуулдаг этгээдүүдийн үйлдлийн арга нарийсаж байгааг дээрх үйлдэл харуулж байгаа юм.