Ойрын өдрүүдэд монгол орны ихэнх нутгаар халж, нутгийн хойд хэсгээр бороо, дуу цахилгаантай аадар орох тул голын усны түвшин нэмэгдэх, нөөлөг салхи, мөндөр, аянга цахилгааны аюулаас сэрэмжтэй байхыг анхаарууллаа.

ЦУОШГ-ын мэдээлснээр өнөөдөр ихэнх нутгаар солигдмол үүлтэй, баруун аймгуудын нутгийн зүүн, төв, говь, зүүн аймгуудын нутгийн зарим газраар бороо, дуу цахилгаантай аадар орно. Салхи нутгийн хойд хэсгээр баруун хойноос, бусад нутгаар баруунаас секундэд 4-9 метр, нутгийн зарим газраар борооны өмнө түр зуур ширүүсэх юм. Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Эг, Үүр, Туул, Тэрэлж голын хөндийгөөр 22-27, Их нууруудын хотгор, Алтайн өвөр говь болон говийн бүс нутгийн зүүн хэсгээр 32-37, бусад нутгаар 26-31 градус дулаан байна. 

Улаанбаатар хот, Багануур, Тэрэлж орчмоор үүлшиж, дуу цахилгаантай аадар орно. Салхи баруунаас секундэд 4-9 метр, борооны өмнө түр зуур ширүүсэн, өдөртөө 26-28 градус, Тэрэлж орчмоор өдөртөө 25-27 градус дулаан байх ажээ.