Украины Ерөнхийлөгч Владимир Зеленский НАТО-гийн Ерөнхий нарийн бичгийн дарга Марк Рюттетэй агаарын довтолгооноос хамгаалах цогцолборын пуужингуудыг нэн яаралтай нийлүүлэх шаардлагатай байгаа талаар хэлэлцсэн тухайгаа мягмар гаригт Telegram сувгаараа мэдээлжээ.

Тэрбээр Туркийн нийслэл Анкара хотноо болж буй Умард Атлантын эвслийн дээд хэмжээний уулзалтын хүрээнд зохион байгуулсан Батлан хамгаалах салбарын үйлдвэрлэлийн чуулганд оролцож үг хэлэв. 

"Оросын цэргүүд Украины хот, суурингуудад цохилт өгсний улмаас учраад буй хохирлын талаар Маркт мэдээллээ. Үүнээс гадна эвслийн гишүүн орнууд PURL хөтөлбөрт нэмэлт хандив оруулж байгаа тухай болон "баллистик пуужингаас хамгаалах эвсэл" байгуулах асуудлыг тусгайлан хэлэлцсэн" хэмээн В.Зеленский онцолсон байна. В.Зеленский, М.Рютте нар мөн зэвсэг хамтран үйлдвэрлэх болон НАТО-гийн гишүүн орнууд болон Украин хоорондын батлан хамгаалах салбарын хамтын ажиллагааг гүнзгийрүүлэх асуудлыг хөндөн ярилцжээ.

"Европ тив пуужингийн довтолгооноос хамгаалах систем болон уг системийн пуужингуудыг үйлдвэрлэх чадавхтай болох нэн шаардлагатай байна" гэж Украины удирдагч онцлоод агаарын довтолгооноос хамгаалах "Patriot" цогцолборын одоогийн үйлдвэрлэл өсөн нэмэгдэж буй хэрэгцээг хангаж чадахгүй байгаа тул энэ нөхцөл байдалд шуурхай хариу арга хэмжээ авах ёстой гэж мэдэгджээ. Тэрбээр мөн Америкийн талтай уг цогцолборыг үйлдвэрлэх тусгай зөвшөөрлийн талаар хэлэлцсэнээ дурдсан байна.

Анкарад болсон уулзалтын үеэр В.Зеленский мөн Украиныг НАТО-д элсүүлэх асуудлыг дахин хөндөж, "Украинтай НАТО бол ирээдүйн эвсэл мөн" хэмээн мэдэгджээ. Харин Д.Трамдын засаг захиргаа Украиныг энэ зорилгоосоо татгалзах ёстой гэсэн байр суурьтай байгаагаа хэдэнтээ илэрхийлээд байгаа юм. 

М.Рютте Атлантын далай дамнасан батлан хамгаалах салбарын үйлдвэрлэлд "хувьсгал" хийхийг уриалав

НАТО-гийн Ерөнхий нарийн бичгийн дарга М.Рютте Орос, Хятад, Умард Солонгосоос учирч буй аюул заналтай холбогдуулан Атлантын далай дамнасан батлан хамгаалах салбарын үйлдвэрлэлд "хувьсгал" хийхийг уриалжээ. Үүний тулд урт хугацааны захиалгуудыг нэмэгдүүлэх, хөрөнгө оруулалтыг эрс өсгөх, хүнд суртлыг багасгах шаардлагатайг онцолсон байна.

"Батлан хамгаалахын аж үйлдвэрийн салбар эрсдэл хүлээхэд бэлэн байх ёстой. Эрэлт асар их бий гэдгийг та бүхэн мэдэж байгаа" хэмээн тэрбээр батлан хамгаалах салбарын төлөөлөгчдөд хандан хэлжээ.

НАТО-гийн дээд хэмжээний уулзалт долоодугаар сарын 7-8-ны өдрүүдэд Анкара хотноо болж байна. Энэ удаагийн уулзалтад АНУ-ын Ерөнхийлөгч Дональд Трамп болон ХБНГУ-ын Канцлер Фридрих Мерц зэрэг тус эвслийн бүх 32 гишүүн орны удирдагчид оролцож байна.