Олон улсын судлаачдын баг орчноос эрчим хүч хуримтлуулж, цахилгаан хэрэгслүүдийг батарейгүйгээр ажиллуулах боломжийг олгох квант үзэгдлийг илрүүлжээ.

Австралийн Квинслэндийн технологийн их сургууль болон Сингапурын Наньяны технологийн их сургуулийн эрдэмтдийн явуулсан уг судалгаагаар "шугаман бус Холлын эффект" хэмээх квант үзэгдлийг судалсан байна. Энэхүү үзэгдэл нь хувьсах гүйдлийн цахилгаан дохиог шууд ашиглаж болох тогтмол гүйдэл болгон хувиргах чадвартай. Цахилгаан эрчим хүчийг хувиргахад ашигладаг уламжлалт электрон эд ангиудтай харьцуулахад "шугаман бус Холлын эффект" нь нарийн төвөгтэй хэлхээ шаардахгүйгээр тогтмол гүйдлийг үүсгэж чаддаг байна. 

Энэхүү нээлт нь өөрөө өөрийгөө эрчим хүчээр тэжээдэг мэдрэгч, өмсөж, зүүж хэрэглэдэг ухаалаг төхөөрөмжүүд, утасгүй холбооны системийн эд ангиудыг хөгжүүлэхэд чухал хувь нэмэр оруулна гэж судлаачид үзэж байна. Туршилтын явцад "шугаман бус Холлын эффект" нь өрөөний температурт хүрэхэд тогтвортой үргэлжилж байсан нь уг нээлтийг практикт бодитоор нэвтрүүлэхэд чухал алхам болжээ. Мөн ирээдүйн төхөөрөмжүүд нь радио давтамжийн дохио, утасгүй долгионы дамжуулалт зэрэг орчны эх үүсвэрүүдээс бага хэмжээний эрчим хүчийг хуримтлуулах боломжтойг судалгааны үр дүн харуулжээ.

Ингэснээр бага чадлын царим цахилгаан хэрэгсэлд батерейны хэрэгцээг багасгах, эсвэл бүрмөсөн ашиглахгүй байх боломжтой болно. Хэдийгээр уг нээлтийг практикт нэвтрүүлэхэд хугацаа шаардлагатай байгаа боловч эрчим хүч хуримтлуулагч авсаархан төхөөрөмж, дэвшилтэт утасгүй технологи болон дараагийн үеийн электрон системийг хөгжүүлэхэд чухал суурийг тавьж өгсөн гэдгийг эрдэмтэд онцолжээ.