Монгол Улсын хууль тогтоомжийг 2028 он хүртэл боловсронгуй болгох үндсэн чиглэлд “Нотариатын үйл ажиллагаа, эрх зүйн зохицуулалтыг боловсронгуй болгох зорилгоор зайн гэрчлэлтийн эрх зүйн зохицуулалтыг бий болгох”-оор тусгажээ.
Энэ хүрээнд Хууль зүй, дотоод хэргийн сайдын 2026 оны нэгдүгээр сарын 16-ны өдрийн А/13 дугаар тушаалаар Нотариатын тухай хуульд нэмэлт, өөрчлөлт оруулах тухай хуулийн төслийг боловсруулах үүрэг бүхий Ажлын хэсэг байгуулж, тус хуулийн төслийн олон нийтийн хэлэлцүүлгийг өнөөдөр зохион байгууллаа.
Зайн гэрчлэлтийн эрх зүйн зохицуулалтыг бий болгох хүрээнд зайн гэрчлэлтээр хийх үйлдлийн төрөл, тавих шаардлага, талуудын эрх, үүрэг, хариуцлагыг тодорхой тусгаж өгснөөс гадна үйлчлүүлэгчийн хувийн байдлыг тогтоохдоо /нүүр царай болон биеийн давхцахгүй өгөгдөл/ төрд байгаа мэдээллийг, тоон гарын үсгийг ашиглах, зайн гэрчлэлт хийхээс татгалзах үндэслэл зэргийг нарийвчлан тусгаад байна. Ингэснээр, нотариатын үйлчилгээ авахын тулд тухайн иргэн заавал биеэр очиж шаардлагагүй, төрд байгаа мэдээллийг цахим хэлбэрээр үйлчилгээ авах боломжийг бүрдүүлэх юм.
Энэхүү хэлэлцүүлгээр нотариатын үйлчилгээний хөлс зардлын хэмжээг уян хатан тогтоох /хөнгөлөлт, чөлөөлөлт үзүүлэх/ зохицуулалт бий болгох, нотариатын мэдэгдэх хуудасны үр нөлөөг дээшлүүлэх зорилгоор хуульд шаардлагатай зохицуулалтыг тусгах, хууль тогтоомжийн тодорхой, ойлгомжтой, холбогдох харилцааг бүрэн зохицуулсан байх, нэг мөр хэрэгжүүлэх зарчмыг хангах үүднээс одоо журмаар зохицуулж байгаа суурь шинжтэй харилцааг хуульд тусгах асуудлын талаар танилцуулсан талаар ХЗДХЯ-наас мэдээлэв.
