Ираны хүний эрхийн төлөө тэмцэгч, Нобелийн Энх тайвны шагналт Наргес Мохаммадид өлсгөлөн зарласных нь дараа 7.5 жил хорих ял оноосон тухай түүний дэмжигчид ням гарагт мэдэгджээ.
Ираны эрх баригчид цөмийн хөтөлбөрийнхөө асуудлаар АНУ-тай хэлэлцээ хийж, Ерөнхийлөгч Дональд Трампын анхааруулсан цэргийн цохилтоос зайлсхийхийг оролдож буй үед Мохаммадид шинээр ял шийтгэл оноолоо. Ираны гадаад бодлогын байгууллагын тэргүүн АНУ-ын төлөөлөгчидтэй Оманд хийсэн хэлэлцээний дараахан хэлэхдээ “Техраны хүч чадал их гүрнүүдэд үгүй гэж хэлэх чадварт оршдог” хэмээн мэдэгдэж, хатуу байр суурь илэрхийлжээ.
Мохаммадигийн дэмжигчид түүний өмгөөлөгч Мостафа Нилигийн мэдээллээс эш татсан байна. Мостафа Нили X сүлжээнд мэдэгдэхдээ, Машхад хотын Хувьсгалт шүүх уг ялыг бямба гарагт оноосон гэж бичжээ. Ийм шүүхүүд нь ихэвчлэн яллагдагчдад өөрсдийгөө хамгаалах, давж заалдах боломж бага олгодог аж.
Мохаммадид “гэмт хэрэг үйлдэх зорилгоор хуйвалдсан” гэх үндэслэлээр зургаан жил хорих ял, “суртал ухуулга явуулсан” хэргээр 1.5 жил хорих ялыг тус тус оноож, хилийн чанадад зорчих эрхийг нь хоёр жилийн хугацаагаар хязгаарласан байна. Мөн Ираний нийслэл Техранаас зүүн өмнө зүгт 740 орчим км-ийн зайд орших Хүсф хотод хоёр жил дотоод цөллөгт явуулахаар шийдвэрлэснийг өмгөөлөгч нэмж дурджээ.
Эх сурвалж:AP
