Хомо сапиенс (оюун ухаант хүн) болон неандертальчуудын өвөг байж магадгүй гэж эрдэмтэд таамаглаж байгаа хүний чулуужсан араг ясны хэсгүүдийг Мароккогийн Залуучууд, соёл, харилцаа холбооны яаманд танилцуулжээ.

Эдгээр эртний олдворыг олон улсын археологийн экспедиц Атлантын далайн эрэгт орших Касабланка хотын ойролцоох “Томас-1” гэдэг нэртэй карьераас илрүүлсэн байна. Судлаачид уг газраас насанд хүрсэн хүний доод эрүүний хэсэг, хүүхдийн бүтэн доод эрүү, гуяны ясны хэсэг, хэд хэдэн шүд, нурууны яс олжээ.

"Нарийн төвөгтэй шинжлэх ухааны шинжилгээ, цахилгаан соронзон туяагаар хийсэн судалгаагаар Мароккогийн баруун хойд хэсгээс олдсон эдгээр чулуужсан олдворууд нь Хомо эретус-т (орчин үеийн хүний шууд өвөг гэж үздэг) хамаарах хэлбэр бүтцийн шинжүүдийг Хомо сапиенсийнхтэй төстэй, илүү хөгжсөн шинжүүдтэй хослуулан агуулж байгааг тогтоосон" гэж төслийн удирдагчдын нэг, Мароккогийн Археологи, үндэсний өвийн хүрээлэнгийн профессор Абдеррахим Мухиб ярилаа.

Түүний хэлснээр, ийм хослол нь уг олдворыг орчин үеийн хүний хувьслын ойлголтыг тайлбарлах, мөн Европт илэрсэн бусад хүний төрлүүд үүсэхэд хүргэсэн “эгч дүүсийн салбар” шугамыг ойлгоход тус дөхөм болох ажээ.

Мухибын хэлснээр, Касабланка орчмоос олдсон энэхүү нээлтийн гол ач холбогдол нь Рабатад танилцуулсан үлдэгдлүүд нь хүний хөгжлийн үндсэн хоёр шугам салж эхэлсэн үе буюу Хомо сапиенс үүссэн Африкийн шугам болон неандертальчуудын эх болсон Евразийн шугамын заагт хамаарч байгаад оршиж байна. Иймээс “Томас-1” карьераас илэрсэн эдгээр чулуужсан олдворуудыг Хомо сапиенс ба неандертальчуудын нийтлэг өвөг дээдсийн хамгийн өндөр магадлалтай төлөөллийн үлдэгдэл гэж үзэж болох юм хэмээн Мароккогийн профессор онцолсон байна.

Судалгаагаар эдгээр чулуужсан яснууд нь 700 мянгаас 773 мянган жилийн настай болох нь тогтоогджээ. Танилцуулгад дурдсанаар, Марокко болон Европын археологичдийн археологи, генетик, антропологийн шинжлэх ухаанд хийсэн энэхүү нээлт нь орчин үеийн хүний үүсэл Африк тивд, ялангуяа Хойд Африкаас эхтэй гэх таамгийг бататгаж, хүний хувьслын үйл явцын ойлголт ба газарзүйн орон зайг улам өргөжүүлж байна.

Эх сурвалж: TASS