Архангай аймгийн Аудитын газраас хүү, торгуулийн орлогын бүрдүүлэлт, зарцуулалтад хийсэн гүйцэтгэлийн аудитын дүнг танилцууллаа. Аймгийн хэмжээнд 2023–2024 онд нийт 3,326.5 сая төгрөгийн хүү, торгуулийн орлого төвлөрүүлсэн байна.
Нийт 19 байгууллагаас 80,577 зөрчилд 2,774.7 сая төгрөгийн торгууль ногдуулснаас 2,287.0 сая төгрөгийг төвлөрүүлж, 42.6 сая төгрөгийг хууль хяналтын байгууллагад шилжүүлжээ. Харин 444.5 сая төгрөгийн торгуулийн орлого төвлөрөөгүй байгаа тул нөхөн төвлөрүүлэх албан шаардлагыг хүргүүлсэн байна.
Торгуулийн орлогын 55.6 хувийг Цагдаагийн газар, 28.8 хувийг Татварын газар, 15.6 хувийг бусад байгууллага төвлөрүүлсэн бөгөөд ихэнх төлбөрийг и-Монгол, и-Баримт, Гэрэгэ аппликейшнээр дамжуулан төлжээ.
Гэмт хэргээс урьдчилан сэргийлэх арга хэмжээнд 2023–2024 онд нийт 636.2 сая төгрөгийн зардал төлөвлөж, 554.6 сая төгрөгийг зарцуулсан байна. Одоогоор 2023 оны 231.5 сая, 2024 оны 214 сая төгрөгийн үлдэгдэл байгааг аудитын дүнгээр онцолжээ.
Эх сурвалж: Архангай аймгийн Аудитын газар
