Нийслэлийн Толгойтоос Ард Аюушийн өргөн чөлөөтэй холбох 3.9 км урт авто замын бүтээн байгуулалтын ажил 88 хувийн гүйцэтгэлтэй үргэлжилж байна. Эхний 2.4 км замын зорчих хэсгийг зургадугаар сард нээсэн бол үлдсэн 1.5 км хэсгийг аравдугаар сарын 31-нд нээхээр төлөвлөж байна.

НЗДТГ-ын мэдээлснээр, Ард Аюушийн өргөн чөлөөнөөс Толгойтын зам хүртэлх суурь хучилтын ажил бүрэн дуусч, Содон хорооллын уулзвар болон Саппорогийн уулзварын чиглэлд хөдөлгөөний тэмдэг, тэмдэглэгээг суурилуулах ажил явагдаж байна.

Шугам сүлжээний ажлын гүйцэтгэл 90 хувьтай бөгөөд гүйцэтгэгчээр “Монгол зам групп” болон “Ган бүрд” компаниуд ажиллаж байна. Тус зам нь зургаан эгнээ, дөрвөн нүхэн гарц, нэг гүүрэн гарцтай бөгөөд Энхтайваны өргөн чөлөөний баруун хэсгийн ачааллыг 50 хүртэл хувиар бууруулах зорилготой.

Замын нийт урт 3.9 км, зорчих хэсгийн өргөн 25 метр, хоёр талдаа тус бүр хоёр метрийн явган замтай. Гүүр нь 31.1 метр урттай, нийт 4 нүхэн гарц, 14 хоолой, 4 тулц ханатайгаар баригдаж байна.

Эх сурвалж: НЗДТГ