Балбад өрнөсөн хүчтэй эсэргүүцлийн жагсаалын үеэр 19 хүн амиа алдаж, 100 гаруй хүн шархдаж, нийгмийн бухимдал улам даамжирсны дараа Засгийн газар өнгөрсөн долоо хоногт тавьсан нийгмийн сүлжээний хоригийг цуцалжээ. Харилцаа холбоо, мэдээллийн технологийн сайд Притви Субба Гурунг Ройтерст мэдээлэхдээ, “нийгмийн сүлжээний платформууд одоо хэвийн ажиллаж байна” хэмээн мэдэгдсэн байна.

Эсэргүүцлийн жагсаал “Z үеийнхний жагсаал” нэртэйгээр олон хотод өрнөж, авлига, эдийн засгийн боломжгүйдэлтэй тэмцэхийг шаардсан залуусын дуу хоолой болсон юм. Тэд засгийн газрын хариу арга хэмжээ хангалтгүй байна гэж үзсэн бөгөөд хориг нь бухимдлыг улам хурцатгажээ.

Ерөнхий сайд К.П. Шарма Оли хүч хэрэглэсэн явдалд харамсч байгаагаа илэрхийлээд, амиа алдсан хүмүүсийн ар гэрт тусламж үзүүлэх, шархадсан иргэдийг үнэ төлбөргүй эмчлэхээ мэдэгдэв. Мөн арван тав хоногийн дотор болсон явдлын шалтгааныг тогтоож, дахин ийм нөхцөл байдал үүсгэхгүй байх зорилгоор мөрдөн шалгах ажлын хэсэг байгуулсан байна.

Засгийн газар нийгмийн сүлжээг хаахдаа “Facebook” зэрэг платформ дээр хуурамч үнэмлэх, ташаа мэдээлэл, үзэн ядсан үг хэллэгийн тархалтыг зогсоох зорилгоор бүртгүүлээгүй сүлжээнүүдийг хаасан гэж тайлбарласан боловч энэ шийдвэр нь эсэргүүцлийн гол өдөөгч хүчин зүйл болжээ.