Индонезийн нийслэл Жакарт хотод хэдэн зуун эмэгтэй ягаан хувцас өмсөж, шүүр барин жагсжээ. Тэд цагдаагийн хүчирхийлэл, Засгийн газрын хэт зардлын эсрэг эсэргүүцлээ илэрхийлж, “Цагдааг шинэчилье” гэсэн бичигтэй самбар барьцгаажээ.

Жагсаал хоёр дахь долоо хоногтоо үргэлжилж, амьдралын өртөг нэмэгдсэн болон гишүүдийн өндөр урамшуулалд иргэдийн бухимдал ихэсчээ. Жагсаал хурцатмал байдалд шилжиж, мотоциклийн жолооч цагдаагийн машинд мөргүүлж амиа алдсан хэрэг гарсан байна.

Эсэргүүцлийн үеэр Индонезийн Эмэгтэйчүүдийн эвсэл (IWA) шүүрийг “улс орны бохир, милитаризм, цагдаагийн дарамтыг цэвэрлэх тэмүүлэл” гэж тайлбарласан байна. IWA-д 90 гаруй эмэгтэйчүүдийн байгууллага, хөдөлгөөн, хөдөлмөрийн холбоо, хүний эрх, уугуул иргэдийн байгууллагууд багтдаг. Эмэгтэйчүүд өнгөрсөн хугацаанд Индонезийн засаглалын эсрэг тэмцэж ирсэн түүхтэй.

Онлайнаар жагсагчид ягаан болон ногоон өнгийг “Зоригтой ягаан” ба “Баатарлаг ногоон” гэж нэрлэн дэмжлэг үзүүлж байна.

НҮБ-ын хүний эрхийн алба жагсаалын үеэр хүний эрх зөрчигдсөн гэх асуудлыг шуурхай, ил тод шалгах шаардлагатайг анхааруулсан бол Индонезийн Амнисти Интернэшнл байгууллагын Гүйцэтгэх захирал Усман Хамид “Төр иргэдийн шаардлагыг биелүүлж, цаашид хүн амь эрсдэхээс сэргийлэх ёстой” гэж мэдэгджээ.

Наймдугаар сарын эцэс хүртэлх жагсаалын үеэр дор хаяж 10 хүн амиа алдаж, 1,042 хүн эмнэлэгт хүргэгдсэн гэж Индонезийн Хуулийн байгуулагаас мэдээлжээ.

Ерөнхийлөгч Прабово Субианто улс төрчдөд олгож буй урамшууллыг багасгах шийдвэр гаргасан ч, жагсагчид үүнийг хангалтгүй гэж үзэж, илүү гүнзгий шинэчлэл шаардаж байгаа юм байна.

Эх сурвалж: BBC