Афганистаны баруун нутгийн Герат мужид мягмар гарагт автобус, мотоцикл, шатахуун тээвэрлэгч ачааны машин мөргөлдөж ноцтой осол гарлаа. Энэ ослын улмаас 71 хүн, тэдний дотор 17 хүүхэд амиа алдсан гэж DW мэдээллээ.

Al Jazeera-гийн мэдээлснээр, амиа алдсан хүмүүсийн олонх нь Кабул руу зорчиж явсан автобусанд байсан бөгөөд тэдний дотор Иранаас албадан гаргасан афганчууд олноороо байжээ. Цагдаагийн байгууллагын мэдээлснээр автобус эхлээд мотоциклтой, дараа нь шатахуун тээвэрлэгч машинтай мөргөж, улмаар автобус шатсан байна. Жолооч хурд хэтрүүлж, замын хөдөлгөөний дүрэм зөрчсөн нь ослын гол шалтгаан болжээ.

НҮБ-ын тооцооллоор зөвхөн 2025 оны эхний хагаст 1,2 сая орчим афганчууд Иран, Пакистанаас нутаг буцсан байна. Харин Ираны Дотоод хэргийн сайдын мэдэгдлээр 2026 оны гуравдугаар сар хүртэл 800 мянга орчим афган иргэн тус улсыг орхин явах ёстой аж. Энэ оны гуравдугаар сард Ираны Засгийн газар хууль ёсны зөвшөөрөлгүйгээр амьдарч буй афганчуудыг долоодугаар сарын 6-наас өмнө сайн дураараа нутаг буцахыг шаардсан юм.

Афганистанд олон хүний аминд хүрсэн зам тээврийн осол байнга тохиолддог бөгөөд энэ нь дайнаас болж замууд эвдэрсэн, замын хөдөлгөөнд хяналт сул, жолооч нар хурд хэтрүүлдэгтэй холбоотой гэж мэргэжилтнүүд онцолж байна.

Эх сурвалж: DW, Al Jazeera