Малчид, иргэд, хадланчдад зориулан цаг уурын байгууллагаас сэрэмжлүүлэг гаргалаа. Наймдугаар сарын 19-20-нд шилжих шөнө Өмнөговь, Дундговийн баруун хэсгээр, 20-ны өдөр Төв, Сэлэнгэ, Дундговь, Өмнөговийн нутгаар, мөн 20-21-нд шилжих шөнө Говьсүмбэр, Хэнтий, Дорнод, Сүхбаатар аймгуудын нутгаар усархаг аадар бороо үргэлжилнэ. Иймээс нөөлөг салхи, аянга, цахилгаан, мөндөр, үер усны аюулаас сэрэмжтэй байхыг анхааруулж байна.

2025 оны наймдугаар сарын 19-ний өдрийн урьдчилсан мэдээгээр нутгийн баруун хагаст үүлшинэ, зарим газраар дуу цахилгаантай бороо орно. Төвийн аймгуудын баруун хэсгээр мөн бороо орох бол бусад нутгаар тогтуун байна. Салхи ихэнх нутгаар секундэд 5-10 метр хүрч, борооны өмнө түр зуур ширүүсэх төлөвтэй.

Агаарын температур Дархадын хотгор, Монгол-Алтай, Хангай, Хөвсгөлийн уулархаг нутагт 17-22 хэм, говийн бүсийн өмнөд хэсэгт 30-35 хэм, бусад нутгаар 23-28 хэм дулаан байх аж.

Улаанбаатар хот орчимд үүлшинэ ч бороо орохгүй, өдөртөө 26-28 хэм дулаан байна. Багануур орчимд мөн бороо орохгүй, 24-26 хэмийн дулаан ноёлно. Тэрэлж орчимд 23-25 хэм дулаан байх бөгөөд бороо орохгүй тогтуун цаг агаар үргэлжлэхийг мэдээллээ.

Эх сурвалж: Цаг уур, орчны шинжилгээний газар