Европын Холбооны Гадаад бодлого, аюулгүй байдлын асуудал эрхэлсэн Дээд төлөөлөгч Кая Каллас Израилын эрх баригчдын E1 сууринг барих төлөвлөгөөг олон улсын эрхзүйн зарчмыг зөрчиж байна хэмээн мэдэгдлээ. Тэрбээр уг бүтээн байгуулалт нь эзлэгдсэн Дорнод Иерусалим ба Иордан голын Баруун эргийн газар зүйн холбоосыг устгаж, Баруун эргийн хойд болон өмнөд хэсгийн уялдааг тасална гэж анхааруулав. Израилыг энэхүү ажлаа нэн даруй зогсоохыг тэр уриалжээ.
Германы Засгийн газар ч мөн уг төлөвлөгөөг эсэргүүцэж, олон улсын эрхзүй, НҮБ-ын тогтоолууд болон Олон улсын Эрүүгийн шүүхийн шаардлагыг зөрчиж байна гэж мэдэгдсэн байна.
Израилын Сангийн сайд Бецалел Смотричийн мэдээлснээр, Иерусалимаас зүүн тийш 7 км-ийн зайд орших Маале-Адумимын ойролцоо 3401 орон сууц, мөн E1 төслийн хүрээнд зэргэлдээх дүүрэгт 3515 орон сууц барихаар төлөвлөжээ. Олон улсын эрхзүйн дагуу Палестины эзлэгдсэн нутагт еврейн суурин байгуулах нь хууль бусд тооцогддог ч Израилын тал Баруун эрэгт хэдэн арван жилийн турш суурин барьсаар байна.
Эх сурвалж: DW
