Японы “Mitsubishi” корпорац АНУ-ын Аризона мужид хэрэгжих “Copper World” нэртэй зэсийн уурхайн төслийн 30 хувийг худалдаж авахад 600 сая ам.доллар зарцуулах шийдвэр гаргалаа. Төслийг хэрэгжүүлэгч Канадын “Hudbay Minerals” компанитай тохиролцоонд хүрсэн бөгөөд олборлолтыг 2029 оноос эхлүүлж, жилд ойролцоогоор 100 мянган тонн зэс гаргахаар төлөвлөжээ.
Энэхүү хөрөнгө оруулалтын шийдвэр нь АНУ-ын Ерөнхийлөгч Дональд Трамп наймдугаар сард зэсийн бүтээгдэхүүнд 50 хувийн татвар ногдуулсны дараа гарсан байна. Шинэ татвар нь утас, хоолой, кабель, цахилгаан эд анги зэрэг зэсийн орц өндөртэй бүтээгдэхүүнд хамаарч, дотоодын үйлдвэрлэлийг дэмжих зорилготой юм.
“Mitsubishi”-гийн мэдээлснээр, АНУ нь дэлхийн зэсийн хоёр дахь том хэрэглэгч бөгөөд хүн амын өсөлт, хиймэл оюун ухааны салбарын эрчим хүчний эрэлт, эрчим хүчний шилжилт зэрэг хүчин зүйлс зэсийн эрэлтийг улам нэмэгдүүлэх төлөвтэй байна.
Эх сурвалж: NHK
