Энэтхэгийн хойд хэсэгт орших Киштвары дүүргийн Чосити хэмээх алслагдсан тосгонд болсон үерийн улмаас 46 хүн амь үрэгдсэн байна. Тус тосгон нь Гималайн алдарт сүм рүү очдог мөргөлчдийн замд оршдог бөгөөд үерийн улмаас олон автомашин урссан, аврах ажиллагаа үргэлжилж байгаа тухай цахим сүлжээнд дүрс бичлэгүүд таржээ.

Үерийг гэнэтийн аадар борооноос үүссэн гэж албаныхан мэдэгдэж, Жамму ба Кашмирээс сонгогдсон Холбооны сайд Житендра Сингх үүнийг “асар их хэмжээний” үер гэж тодорхойлсон бөгөөд аврах багууд газар дээр очиход хүндрэлтэй байна гэж хэлэв. Зам усанд автаж, нисдэг тэрэг нисгэхэд аюултай нөхцөл байдалтай байгаа тул тусламжийн ажиллагаа хүнд байгаа юм.

Ойрын Атхоли тосгоны нэг оршин суугч AFP агентлагт хэлэхдээ "хорь орчим цогцос орон нутгийн эмнэлэгт хүргэгдсэн байна" гэжээ. Мөргөлчдийг хооллох томоохон олон нийтийн гал тогоо үерийн улмаас бүрэн эвдэрсэн байна.

Тус бүсийн Ерөнхий сайд Омар Абдулла энэ ослыг “гай гамшиг” гэж нэрлэн, Энэтхэгийн тусгаар тогтнолын өдрийн баярын зарим соёлын арга хэмжээг цуцалжээ. Тэрбээр “мэдээлэл удааширч байгаа ч бүх боломжит нөөц ашиглан аврах ажиллагааг зохион байгуулж байна” гэв.

Энэтхэгийн Ерөнхий сайд Нарендра Моди “хэрэгтэй хүмүүст бүх боломжит тусламжийг үзүүлнэ” гэж амласан байна.

Хойд Энэтхэгийн бүс нутагт сүүлийн өдрүүдэд хүчтэй бороо орж, хэд хэдэн газарт үерийн аюул нүүрлэж байгаа бөгөөд өмнөх долоо хоногт Уттаракханд мужийн Дархали тосгон үерийн улмаас хагас нь усанд автсан бөгөөд 66 хүн сураггүй алга болсон билээ.

Эх сурвалж: BBC News