Газын зурваст хуурай замын томоохон ажиллагаа явуулах төлөвлөгөөг өмнө нь эсэргүүцэж байсан Израилийн Батлан хамгаалах хүчний жанжин штабын дарга Эяль Замир лхагва гарагт шийдвэрээ өөрчилж, төлөвлөгөөний үндсэн бүтцийг баталлаа. Тэрбээр өмнө нь энэ төлөвлөгөөг Израилийн цэргүүд болон ХАМАС бүлэглэлийн барьцаанд байгаа хүмүүст өндөр эрсдэлтэй гэж үзэн эсэргүүцэж байв.
Энэ мэдэгдэл нь Израилийн Онц байдлын засгийн газар Газа хотыг бүрэн хяналтдаа авах, мөн Газын гол дүрвэгсдийн хуарангуудад үйл ажиллагаа явуулж буй ХАМАС-ын үүрүүдийг устгах зорилготой довтолгоо хийх тушаал гаргасны дараа гарч байна. Хэдийгээр хуурай замын ажиллагааны тов хараахан гараагүй байгаа ч Израилийн байлдааны онгоцууд сүүлийн өдрүүдэд Газын хамгийн том хотыг тасралтгүй бөмбөгдөж байгаа бөгөөд ХАМАС-ын хяналтад байдаг эрүүл мэндийн байгууллагын мэдээллээр сүүлийн 24 цагт 123 хүн амь үрэгджээ.
Газын иргэний хамгаалалтын агентлагийн мэдээлснээр, бөмбөгдөлтийн үеэр өндөр барилга зэрэг иргэний байгууламжийг онилсон хүчтэй агаарын цохилтууд өгсөн байна.
Эх сурвалж: DW
