Европын сансар судлалын агентлаг (ЕКА)-ийн “Solar Orbiter” хөлөг Нарны өмнөд туйлын гэрэл зургуудыг анх удаа маш өндөр нарийвчлалтайгаар авч, Дэлхий рүү амжилттай илгээжээ. Энэ нь Нарны идэвхжил болон түүний мөчлөгийг илүү гүнзгий ойлгоход чухал түлхэц болох юм.

Эрдэмтдийн тайлбарласнаар, Нарны идэвхжил ихсэх нь хиймэл дагуулын холбоо, интернэт, эрчим хүчний сүлжээ зэрэг манай гаригийн дэд бүтцэд сөргөөр нөлөөлж болзошгүй. Иймд Нарны соронзон орон, гадаргуугийн давхаргууд дахь өөрчлөлт, материалын хөдөлгөөнийг судлах нь онцгой ач холбогдолтой.

Шинэ зурагнуудад Нарны гэрлэн мандлын (corona) тод мяралзан асах давхарга нь Цельсийн нэг сая хэмд хүрч, түүний дунд 100 мянган хэм орчим температуртай хар бараан хийн үүлс холилдон байгааг дүрсэлжээ.

ЕКА-гийн шинжлэх ухаан хариуцсан захирал, профессор Кэрол Манделл уг зургийн ач холбогдлыг тодотгож, “Эдгээр нь амьдралыг тэтгэгч манай одныг хамгийн ойроос, хамгийн нарийн төвөгтэйгээр харуулсан анхны дүрслэлүүд юм. Нар бол бидний амьдралын эх үүсвэр төдийгүй сөнөөх ч хүчтэй учраас түүнийг судлах нь зайлшгүй шаардлагатай” гэж онцлон хэлжээ.

“Solar Orbiter” аппарат Нарны соронзон орон, титэм, гэрлэн мандал зэрэг бүсийг PHI, EUI, SPICE нэртэй гурван төрлийн багаж ашиглан зурсан байна. Эдгээр төхөөрөмж нь Нарны гадаргуу дээрх материалын хөдөлгөөн, хийн урсгал, туйл орчмын хуйлрал зэргийг судлахад эрдэмтдэд хэрэгтэй мэдээлэл өгнө гэж үзэж байна.

“Solar Orbiter” аппарат Нарны хойд туйл руу чиглэж, дараа нь өмнөд туйл орчмыг тойрон нисэж, байршлын хувьд хамгийн оновчтой цэгээс зураг авсан байна. ЕКА уг нислэг болон цуглуулсан мэдээллийн дэлгэрэнгүй тайлангаа энэ оны аравдугаар сард нийтлэхээр төлөвлөжээ.

Эх сурвалж: BBC, European Space Agency (ESA)