АНУ-ын Жон Хопкинсийн их сургуулийн эрдэмтэд хорт хавдрын онош тавигдахаас гурван жилийн өмнө цуснаас илрүүлж болох аргыг олсон талаар EurekAlert сэтгүүл мэдээлжээ. Судалгааны багийн дүгнэлтээр, хавдрын эсүүдийн ялгаруулдаг генетикийн материал (cfDNA)-ыг хүний цуснаас урьдчилан илрүүлэх бүрэн боломжтой болжээ.

Энэхүү судалгаа нь өмнө нь олон төрлийн хорт хавдрыг илрүүлдэг MCED (Multi-Cancer Early Detection) шинжилгээний хүрээнд хийгдсэн байна. Судалгаанд оролцсон 52 хүний хуучин цусны шинжилгээний дээж дээр ажилласны үр дүнд, найман тохиолдолд хожим хорт хавдартай болох нь тогтоогдсон бөгөөд тэдгээрийн тал нь оношлогдохоос 3–3.5 жилийн өмнө цусны дээжээ өгсөн байжээ.

Судлаачдын үзэж байгаагаар, ийм эрт үед илэрсэн хорт хавдрууд ихэвчлэн хүндрээгүй, эмчлэгдэх боломж өндөртэй байдаг тул уг арга нь эрт оношилгоо, амьдралын чанар, нас баралтын түвшинд бодитой эерэг нөлөө үзүүлнэ гэж дүгнэжээ.

Энэхүү нээлт нь хорт хавдартай тэмцэх эрт илрүүлэлтийн шинэ шат болж, анагаах ухаанд томоохон ахиц авчирч болзошгүйг судлаачид онцолж байна.

Эх сурвалж: EurekAlert, officelife.media