Австралийн Мельбурн хот дахь Питер Доэртигийн нэрэмжит Халдвар, дархлаа судлалын хүрээлэнгийн судлаачид ХДХВ вирусийг хүний биеийн дархлааны эсүүдийн дотор нуугдаж байхад нь илрүүлэх шинэ аргыг нээжээ. Уг судалгааны үр дүнг “Nature Communications” сэтгүүлд нийтэлсэн талаар “The Guardian” сонин мэдээлсэн байна.

ХДХВ нь хүний биеийн цусны цагаан эсүүд дотор нуугдаж, дархлааны систем болон уламжлалт эмчилгээнээс бултах чадвартай учир олон жилийн турш бүрэн эдгэрүүлэх арга байхгүй хэвээр байсаар ирсэн. Гэвч шинэ технологийн тусламжтайгаар вирусийг эсийн дотор байрлаж буй “нуувчнаас” нь илрүүлэх боломж бүрдэж байгааг судлаачид онцолжээ.

Энэ шинэ арга нь "COVID-19"-ийн үед вакцин бүтээхэд ашиглагдсан мРНХ (мессенжер РНХ) технологид суурилсан. Судлаачид тусгайлан бүтээсэн өчүүхэн хэмжээтэй өөхөн капсулд мРНХ-г байршуулж, вирус нуугдаж буй эсүүд рүү хүргэж чадсан байна. Улмаар мРНХ нь тэдгээр эсүүдэд вирус илрүүлэх “зааварчилгааг” өгч, дархлааны систем вирусийг таних боломжтой болжээ.

Энэхүү нээлт нь ХДХВ-ийн халдварыг бүрэн эмчлэх гарц руу хөтлөх магадлалтай, шинжлэх ухааны чухал дэвшил гэж үзэгдэж байгаа бөгөөд цаашдын эмчилгээний судалгаанд суурь болж өгнө хэмээн шинжээчид дүгнэж байна.

Эх сурвалж: TASS