Анагаахын Боловсролын Дэлхийн Холбоо (WFME), Анагаахын Боловсролын Магадлан Итгэмжлэлийн Хүрээлэн (IMEAc)-ийн хамтран зохион байгуулсан “WFME World Conference 2025: Health for All – Through Quality Medical Education” сэдэвт олон улсын чуулган 2025 оны тавдугаар сарын 25-28-ны өдрүүдэд Тайландын Бангкок хотноо амжилттай болж өндөрлөлөө. Чуулганд дэлхийн 92 орны 900 гаруй төлөөлөгч оролцсон нь анагаахын боловсролын салбарын хамгийн өргөн цар хүрээтэй, нөлөө бүхий арга хэмжээ байлаа.

Чуулганыг WFME-ийн ерөнхийлөгч Ricardo León-Bórquez нээж, холбооны бүс нутгийн захирлууд болох Зүүн Өмнөд Ази, Номхон Далайн Баруун бүс, Европ, Африк, Америкийн бүсийн удирдагчид олон улсын хэлэлцүүлгүүдийг чиглүүлэн зохион байгуулсан юм.

WFME нь анагаахын боловсролын гурван төрлийн итгэмжлэл, Дэлхийн Анагаахын Сургуулиудын Жагсаалт (World Directory of Medical Schools), сургалтын хөтөлбөрт тавих 5 үндсэн стандарт зэрэг олон улсын хэмжээнд мөрдөгдөх хөтөлбөрийг хэрэгжүүлдэг. Энэ удаагийн чуулганаар шинэ тунхаглал батлагдсан нь онцлох үйл явдал боллоо. Тус тунхаглалаар анагаахын оюутан, резидент эмч, практик эмч нарыг дэмжих чиглэлд байгууллагууд хариуцлага хүлээх эрх зүйн үндсийг илүү тодорхой болгожээ.

Чуулганы хүрээнд анагаахын боловсролын ирээдүйн чиг хандлага, хиймэл оюуны ухаалаг хэрэглээ, нийгмийн хэрэгцээнд нийцсэн мэргэжилтэн бэлтгэх, магадлан итгэмжлэлийн ач холбогдол зэрэг сэдвийн хүрээнд 100 гаруй илтгэл хэлэлцэгдсэн бөгөөд Монгол Улсаас АШУҮИС-ийн төгсөлтийн өмнөх сургалтын хөтөлбөрийн магадлан итгэмжлэлийн туршлага хуваалцсан нь олон улсын анхаарал татсан байна.

Үүнээс гадна чуулганд зөвхөн боловсролын байгууллагын төлөөлөгчид төдийгүй оюутнууд, резидент эмч нар, үйлчлүүлэгчдийн төлөөлөл ч оролцож, сургалтад дижитал технологийн нэвтрүүлэлт, хэрэглэгчийн оролцооны ач холбогдлыг танилцуулсан үзэсгэлэн болжээ.

Чуулганы үеэр Төрийн өмчийн соёл, боловсролын газрын дарга С.Хандмаа, Био-Анагаахын сургуулийн захирал Г.Дарамбазар нар WFME-ийн ерөнхийлөгч Ricardo León-Bórquez, Номхон далайн баруун бүсийн захирал Wayne Hodgson, дэд захирал Weimin Wang нартай уулзаж, боловсролын чанар, магадлан итгэмжлэлийн хамтын ажиллагааг өргөжүүлэх талаар санал солилцсон нь Монголын анагаахын боловсролын салбарт олон улсын түвшний харилцааг бэхжүүлэх алхам боллоо.

Эх сурвалж: WFME, IMEAc