Италийн суут сэтгэгч, зохион бүтээгч, зураач Леонардо да Винчийн удам судрын 21 үеийн 400 гаруй хүнийг хамарсан генеалогийн өргөн хүрээтэй судалгааг “Genìa Da Vinci” буюу “Суутан да Винчи” нэртэй номонд эмхэтгэн нийтэлжээ. Энэхүү 30 жилийн турш үргэлжилсэн судалгааны үр дүнд орчин үед амьдарч буй угсаа нэгтэй 15 хүнийг олсон тухай EurekAlert! сайт мэдээллээ.

Түүхэн баримтуудаас үзэхэд, Леонардо да Винчигийн өөрийн үр хүүхэд байгаагүй. Тэрээр гэрлээгүй бөгөөд хүүхэдтэй болсон ямар нэгэн нотолгоо түүхчдэд тодорхой бус хэвээр үлджээ. Харин түүний эцэг нотариус Пьеро да Винчи бол тухайн үеийнхээ нөлөө бүхий хүн байсан бөгөөд дөрвөн удаа гэрлэж, нийт 12–22 хүүхэдтэй байсан нь тогтоогдсон байна. Түүний эдгээр хууль ёсны болон хүлээн зөвшөөрөгдсөн хүүхдүүдийн нэг болох Доменико Бенедеттогийн удмаар да Винчигийн өнөөгийн удам судлагджээ.

Судлаачид удамшлын Y-хромосомын бүтцийг шинжилж үзэхэд, амьд байгаа удамтны зургаагийн Y-хромосом ижил болох нь тогтоогдсон байна. Энэ нь зөвхөн эрэгтэйчүүдийн дамжуулдаг гентэй холбоотой бөгөөд үе үеийнх нь удмыг хөвгүүд залгамжилж ирсэн гэсэн үг юм. Сонирхолтой нь, эдгээр удамтны дунд Италийн алдарт кино найруулагч Франко Зефирелли багтдаг байна.

Харамсалтай нь, Леонардо да Винчигийн өөрийнх нь ДНК өнөөг хүртэл бүрэн тогтоогдоогүй хэвээр байна. Түүнийг нас барсан хэмээн үздэг Франц дахь Амбуаз шилтгээний Сен-Флорантен сүмийг XIX зуунд Францын хувьсгалын үеэр нурааж, тэнд байсан шарилын үлдэгдлийг хэн болохыг нэгмөр тогтоож чадаагүй байна.

Леонардо да Винчи зөвхөн зураач байгаагүй. Тэр нисэх төхөөрөмжүүд зохион бүтээж, усан доорх амьсгалын төхөөрөмж (скафандр), хөдөлгөөнт тайз чимэглэл, хөгжмийн зэмсэг, цэргийн техник, архитектурын шийдлүүдийг бүтээсэн бөгөөд хот төлөвлөлт, байгаль судлалд ч асар их хувь нэмэр оруулсан хүн байв. Тэр өөрийгөө “зураач” хэмээн бус, инженер, зохион бүтээгч, уран барилгач, байгаль судлаач хэмээн танилцуулдаг байжээ.

Эх сурвалж: EurekAlert