Хүний бие махбод ямар ч хоол тэжээлгүйгээр тэсвэрлэх хугацаа тухайн хүний эрүүл мэнд, биеийн жин, орчны нөхцөл, хөдөлгөөн, ус уух боломж зэргээс ихээхэн хамаардаг. Гэхдээ ерөнхий дүр зураг тодорхой байдаг.

Эрүүл насанд хүрсэн хүн, хэрвээ зөвхөн ус ууж, ямар нэг хөдөлмөр хийхгүй, тайван нөхцөлд байвал дунджаар 25–30 хоног тэсч чаддаг. Хүйтэн эсвэл хэт халуун орчинд энэ хугацаа огцом багасна. Уураг, өөх тосны нөөц багатай, туранхай хүмүүс ч мөн богино хугацаанд ядарч сульдана.

Гэсэн хэдий ч түүхэнд хоолгүй удаан амьдарсан бодит тохиолдлууд байдаг.

• 1920 онд Хойд Ирландын хоригдлуудын өлсгөлөн: Арван нэгэн хүн өлсгөлөн зарлаж, ес нь 94 дэх хоногтоо ч амьд байжээ.

• 1973 онд Шотландын Глазго хотын эмнэлэгт: Таргалалттай хоёр эмэгтэй эмчийн хяналтан дор нэг нь 236, нөгөө нь 249 хоног хоолгүй байж, ухаан санаа нь саруул хэвээр байсан баримт бий.

Эдгээр хүмүүс их хэмжээний өөхөн нөөцтэй байсан бөгөөд эмнэлгийн байнгын хяналтад байв. Энэ нь олон хоногийн турш хоолгүйгээр амьдрах үндэс болсон ч жирийн нөхцөлд ийм хугацаа нь онцгой тохиолдол юм.

Харин усаа бүрэн хассан нөхцөлд хүн 3–5 хоногт л амь насанд аюул учирна. Ус бол биеийн бүх системд зайлшгүй шаардлагатай зүйл юм.

Амьтдын ертөнцийн өлсгөлөн

Амьтдын зарим нь хүний төсөөлөхийн аргагүй урт хугацаагаар хоолгүй байж, биологийн онцгой дасан зохицолт, бодисын солилцооны хэмнэлээр амьд үлддэг. Зарим төрлийн амьтад удаан хугацааны унтаа байдалд орж, амьдралын бүх үйл ажиллагаагаа хязгаарлан, амь насанд аюулгүйгээр олон хоног, сар, бүр жилүүдийг хоолгүйгээр өнгөрөөж чаддаг.

Тухайлбал, Сибирийн мөнхийн цэвдэгээс гаргасан дөрвөн хуруут тритон гэдэг газар уснаа явагч амьтан 80-100 жилийн турш хөлдүү орчинд байсны дараа гэсэж, амь орсон баримт бий. Энэ нь эдгээр амьтдын эсийн түвшинд бодисын солилцоо маш удааширч, бараг бүрэн зогсонги байдалд орж чаддгийг баталж байна.

Дэлхийн янз бүрийн амьтад хоолгүй байж чадах дээд хугацааг дараах байдлаар жагсаажээ:

• 2 жил — Аргосын хувалз

• 1 жил 6 сар — Хабу могой

• 1 жил — Тарантул аалз

• 2 сар — Матар

• 1 сар — Галлапагосын нүсэр яст мэлхий

• 3 долоо хоног — Саарал халим

• 4 долоо хоног — Эзэн хааны оцон шувуу

Эдгээр амьтад нь өөрсдийн төрөл зүйлд онцгой дасан зохицсон биеийн бүтэц, илчлэг хадгалах болон удаашруулсан бодисын солилцоогоороо онцлог. Ийм байдлаар өлсгөлөнг тэсвэрлэх чадвар нь амьд үлдэх боломжийг нь эрс нэмэгдүүлдэг.

Эх сурвалж: hamster-travel.ru