Европын Холбоо Оросын эсрэг хэрэгжүүлэх 18 дахь багц хориг арга хэмжээний хүрээнд тэнгисээр тээвэрлэгддэг газрын тосны үнийн дээд хязгаарыг баррель тутамд 60 ам.доллараас бууруулах саналтай байна. ЕХ-ны Эдийн засгийн асуудал эрхэлсэн комиссар Валдис Домбровскис энэ талаар Канад улсад чуулж буй Долоогийн бүлгийн орнуудын Сангийн сайд нарт танилцуулахаа мэдэгдсэн байна.
ЕХ-ны эх сурвалжуудын мэдээлснээр, үнийн шинэ дээд хязгаар 50 ам.доллар байж магадгүй. Одоогийн нөхцөлд Уралс маркийн нефтийн үнэ аль хэдийн энэхүү хязгаарын доор орсон тул зарим барууны танкер, даатгалын үйлчилгээний компаниуд Оросын нефтийг дахин зөөвөрлөж эхэлжээ.
Үүний улмаас Оросын нефть, хийн экспортын орлого 2025 оны тавдугаар сард жилийн өмнөхөөс гуравны нэгээр буурч, ойролцоогоор 6.5 тэрбум ам.доллар болж магадгүй гэсэн тооцооллыг Ройтерс агентлаг танилцуулсан байна.
Энэ нөхцөл байдлаас шалтгаалан Оросын Сангийн яам Холбооны төсвийн алдагдлын хэмжээ гурав дахин өснө хэмээн таамаглаж, төсвийн үзүүлэлтүүдээ шинэчлэн тооцоолжээ. Сангийн сайд Антон Силуанов нефтийн үнийн суурь босгыг өөрчлөх боломжийг үгүйсгээгүй бөгөөд энэ босго нь одоогоор баррель тутамд 60 ам.долларт тогтоогдоод байгаа юм. Үүнээс шалтгаалж Үндэсний баялгийн сангаас зарцуулалт хийгдэж буй аж.
Эх сурвалж: Reuters
