АНУ-ын мэс засалчид дэлхийд анх удаа нүдний ухархайгаар дамжуулан хүзүүний дээд нугалмын хорт хавдрыг амжилттай авсан талаар The Washington Post сонин болон Мэрилендийн их сургуулийн Анагаах ухааны төв мэдээлэв. Уг мэс заслыг мэдрэлийн мэс заслын эмч Мохамед Лабиб удирдан гүйцэтгэсэн бөгөөд энэ нь анагаах ухаанд шинэ хуудас нээсэн чухал үйл явдал боллоо.

Өвчтөн, Мэриленд мужийн оршин суугч Карла Флорес 18 настай байхдаа жолооны курст сууж байх үеэсээ дүрс давхарлаж харах, зүйл хоёр харагдах зовиур илэрсэн байна. Эмнэлгийн олон удаагийн үзлэг, оношилгоо үр дүнд хүрээгүй ч нүдний эмчийн зөвлөмжөөр мэдрэлийн мэс заслын эмч Мохамед Лабибт хандсанаар толгойн гавлын ясны урд хэсэгт тахианы өндөгний хэмжээтэй, ховор төрлийн хорт хавдар илэрсэн байна. Энэ хавдар нь зүүн нүд болон харааны мэдрэлийн судлыг дарж байсан аж.

Эмч нар хавдрыг хоёр удаагийн мэс заслаар авч, эхний удаа гавлын ясыг нээж (трепанаци), дараагийн удаад хамрын хөндийгөөр нэвтэрч мэс засал хийжээ. Гэвч мэс заслын явцад хүзүүний дээд нугалмуудыг хамарсан хоёр дахь хавдар илэрсэн нь илүү ноцтой байдал үүсгэсэн байна. Уг хавдар нь нугасны сувгийг нарийсгаж, амин чухал үйл ажиллагаанд аюул учруулах эрсдэлтэй байсан бөгөөд уламжлалт мэс заслын аргаар авах нь хүндрэл дагуулах магадлалтай байжээ.

Хүзүүний энэ хэсэгт хагалгаа хийх нь гүрээний тараагуур судас, хүзүүний вен, гавлын ясны мэдрэлийн судлууд, дунд чихний хөндийг залгиуртай холбосон сувгийг гэмтээх өндөр эрсдэлтэй. Амны хөндийгөөр хийх тохиолдолд халдвар авах аюултай байсан тул доктор Лабиб нүдний ухархайгаар дамжуулан мэс засал хийх инновацын арга хэрэглэсэн байна.

Энэ аргыг доктор Лабиб олон жилийн турш хүний цогцос дээр хийсэн судалгаа, туршилтын үр дүнд боловсруулсан бөгөөд 2023 онд Journal of Neurosurgery сэтгүүлд энэхүү шинэ аргачлалаа танилцуулсан байна. Ийнхүү түүний судалгаа бодит амьдралд анх удаа хэрэгжиж, амжилттай болсон нь анагаах ухаанд томоохон дэвшил авчирч байгаа юм.

Эх сурвалж: The Washington Post