Малайзын нийслэл Куала-Лумпурын ойролцоо байрлах төрийн өмчит “Петронас” компанийн эзэмшлийн хийн хоолой мягмар гарагт гал гарч, 100 гаруй хүн бэртсэн талаар Селангор мужийн гал түймэртэй тэмцэх албанаас мэдээлжээ. Галын улмаас 60 орчим хүн түлэгдэж, амьсгалын хүндрэл зэрэг шалтгаанаар эмнэлэгт хүргэгдсэн бол олон хүн гэр орноо орхин дүрвэсэн байна. Мөн 49 байшин барилга эвдэрч сүйдсэн гэж гал сөнөөгчид мэдээлсэн байна.
Гал 500 орчим метр урттай хийн хоолойгоос хий алдагдсанаас үүдэлтэй байж болзошгүй бөгөөд холбогдох хавхлагыг хаасан гэж мэдэгджээ. Түймэр газар авсан даруйд олон км-ийн зайнаас ч харагдаж байсан бөгөөд долоон иргэнийг галд автсан гэрээс нь амжилттай гаргаж аварсан байна.
Селангорын Гамшгийн уршгийг арилгах хорооны дарга Мохд Нажван Халими "Кампунг Куала Сунгай Бару тосгонд хүмүүс барилга дотор гацсан байсныг илрүүлж, аврах ажиллагаа үргэлжилж байна" хэмээн мэдэгдэв. Энэхүү осол нь лалын шашинтнуудын хамгийн том баяр болох Рамадан сарын төгсгөлийн үеэр буюу Ийдийн баярын өдөр тохиосон байна.
Эх сурвалж: Reuters, AFP
