Нүүрснээс цэвэр эрчим хүчинд шилжихэд нь хөгжиж буй орнуудад туслах зорилгоор өндөр хөгжилтэй улсуудын байгуулсан 9.3 тэрбум ам.долларын үнийн дүн бүхий уур амьсгалын санхүүжилтийн гэрээнээс АНУ гарахаар шийдвэрлэжээ.

Шотландын Глазго хотноо 2021 онд болсон уур амьсгалын асуудлаарх НҮБ-ын хурлын үеэр хандивлагч 10 орноос бүрдсэн “Эрчим хүчний шилжилтийн түншлэл”-ийн гэрээг /JETP/ анх танилцуулсан юм. Үүний хүрээнд Өмнөд Африк, Индонез, Вьетнам, Сенегал улсууд нүүрснээс татгалзахын тулд зээл, санхүүгийн баталгаа, буцалтгүй тусламжийг хамгийн түрүүнд хүртэх ёстой байв.

Гэхдээ эрчим хүчнийхээ 70 орчим хувийг нүүрсээр хангахын сацуу олон мянган хүнийг ажлын байраар хангадаг ӨАБНУ-ын хувьд ийнхүү шилжих нь хялбар бус алхам юм. Энэхүү гэрээг хэрэгжүүлэхийн тулд АНУ нэг тэрбум орчим долларын хандив оруулахаар төлөвлөж байсан бол Франц, Герман улсууд 1.5 тэрбум еврогийн хөнгөлөлттэй зээл олгох шийдвэрлэсэн болохыг Ройтерс агентлаг мэдээлжээ.

Өмнөд Африкийн Эрчим хүчний шилжилтийн асуудал эрхэлсэн төслийн ахлагч Жоан Йавич хэлэхдээ, АНУ тусламжийн хөтөлбөрөөс гарахаар шийдвэрлэснийг албан ёсоор баталсан байна. Вьетнамын тухайд, мэдээлэл бүхий хоёр албан тушаалтны ярьснаар, JETP түншлэлээс гарч байгаагаа Вашингтон мөн адил мэдэгджээ.