Гадаад харилцааны яам, Шинжлэх ухааны академи, Үндэсний аюулгүй байдлын зөвлөлийн Стратеги судалгааны хүрээлэн хамтран зохион байгуулсан “Ялтын бага хурал-80 ба Монгол Улс” сэдэвт эрдэм шинжилгээний хурал өнөөдөр ГХЯ-нд боллоо.
Эрдэм шинжилгээний хурлын үеэр Олон улс судлалын хүрээлэнгийн захирал, дэд профессор Д.Золбоо “Ялтын бага хурал нь Монгол Улсын тусгаар тогтнолыг баталгаажуулсан түүхэн чухал үйл явдлуудын нэг гэдгийг онцлон тэмдэглэв.**
Мөн Үндэсний аюулгүй байдлын зөвлөлийн Стратеги судалгааны хүрээлэнгийн судлаач, доктор Т.Сүхбаатар “1945 оны аравдугаар сарын 20-нд болсон бүх ард түмний санал хураалтын түүхэн ач холбогдлыг хойч үедээ таниулах нь чухал” гэж үзэж байгаагаа илэрхийллээ.
Хүмүүнлэгийн ухааны их сургуулийн доктор, профессор Д.Уламбаяр “Ялтын бага хурлын үр дүнд Монголын статус-квог хүлээн зөвшөөрсөн нь тус улсын тусгаар тогтнол, бүрэн эрхт байдлыг олон улсын түвшинд баталгаажуулсан чухал үйл явдал болсон” хэмээн онцлов.
Тус хуралд нэр бүхий эрдэмтэд дараах сэдвээр илтгэл тавьж хэлэлцүүлэг өрнүүлэв.
- Доктор, Элчин сайд Р.Болд – “Ялтын бага хурал ба Монгол Улс”
- Доктор, профессор Д.Уламбаяр – “Дипломатын эрх зүйн хүлээн зөвшөөрөх үйл ‘status quo’: мөн чанар”
- Элчин сайд, профессор Д.Баярхүү – “Монголын асуудлаарх Зөвлөлт-Дундад иргэн улсын хэлэлцээ ба гэрээ”
- Доктор Н.Хишигт – “Бүх ард түмний санал асуулга, олон улсын үр дүн”
Энэхүү эрдэм шинжилгээний хурал нь Монгол Улсын тусгаар тогтнолын баталгаажилтад Ялтын бага хурлын үзүүлсэн нөлөө, түүхэн ач холбогдлыг олон талаас нь судалж, хойч үедээ таниулахад чухал ач холбогдолтой арга хэмжээ боллоо.
