НҮБ-ын Ерөнхий Ассамблей 2025 оныг "Квантын шинжлэх ухаан, технологийн олон улсын жил" болгон зарлаж, ЮНЕСКО уг арга хэмжээг удирдан зохион байгуулахаар боллоо. Энэ хүрээнд дэлхийн улс орнууд, боловсрол, шинжлэх ухааны байгууллагууд, хувийн хэвшил болон бусад холбогдох талууд хамтран ажиллаж, шинжлэх ухааны хөгжил, боловсролын чадавхыг бэхжүүлэхийг уриалжээ.
Монгол Улсад ШУА-ийн Физик, технологийн хүрээлэн боловсрол, шинжлэх ухааны байгууллагуудтай хамтран квантын шинжлэх ухаан, технологийн мэдлэгийг түгээн дэлгэрүүлэх ажлыг эхлүүлээд байна.
Энэ хүрээнд Боловсролын ерөнхий газар, Физик, технологийн хүрээлэн хамтран ерөнхий боловсролын сургуулийн сурагчдад квантын шинжлэх ухааны ололт, судалгааны талаар үе шаттай мэдээлэл өгч, туршилтууд зохион байгуулахаар төлөвлөжээ.
“Мэдлэгийн квант түгээе-туршилтууд” үйл ажиллагаа ерөнхий боловсролын 14 дүгээр сургуульд зохион байгуулагдаж, сурагчид "Гурван хэмжээст голограм", "Квант нислэг", "Квант жаал", "Квант баллуур", "Орчлон ертөнцөөр аялъя", "Байгалийн цацраг", "Франк Герцийн туршилт", "Атом долгион функцийн хувьсал", "Цахилгаан соронзон индукц", "Фото элемент", "Фотоны үйлчлэл", "Чулуун доторх амьдрал" зэрэг 12 төрлийн туршилтыг хийж, эрдэмтэн судлаачдаас шинжлэх ухааны ололт, үр дүнгийн талаар мэдээлэл авсан байна.
Энэхүү олон улсын санаачилга нь шинжлэх ухааны боловсролыг дэлхийн хэмжээнд түгээн дэлгэрүүлэх, залуу үеийн шинжлэх ухааны мэдлэгийг өргөжүүлэхэд чухал ач холбогдолтой юм.
