Канадын рапсын импортод демпингийн эсрэг мөрдөн шалгах ажиллагаа явуулна гэдгээ Хятадын Засгийн газар мэдэгдлээ. Канад улс Хятадын бараанд татвар ногдуулсны хариуд ийм алхам хийсэн бололтой гэж NHK телевиз мэдээлжээ.
Хүнсний тос болон бусад олон төрлийн бүтээгдэхүүн үйлдвэрлэхэд ашигладаг рапсын үр үйлдвэрлэгч дэлхийн хамгийн том улсуудын нэг бол Канад юм. Шалгалтын дүнгээс хамааран Хятад руу гаргаж буй рапсын экспортод татвар ногдуулж магадгүй байна.
Рапсаас гадна Канадын зарим химийн бүтээгдэхүүний нийлүүлэлтийг шалгана гэж Хятадын Худалдааны яам мэдэгджээ.
Канадын Засгийн газар Хятадад үйлдвэрлэсэн цахилгаан хөдөлгүүрт автомашины импортод 100 хувийн, ган, хөнгөн цагаан бүтээгдэхүүний импортод 25 хувийн татвар ногдуулах шийдвэр гаргаснаа өнгөрсөн долоо хоногт мэдэгдсэн юм.
Хятадын Худалдааны яам үүний хариуд мэдэгдэл нийтэлж, Хятад улс Канадын ялгаварлан гадуурхсан нэг талын хязгаарлалтын арга хэмжээг эрс буруушааж, эсэргүүцэж байна гэжээ. Мөн Дэлхийн худалдааны байгууллагад гомдол гаргана гэдгээ дурдсан байна.
