Испанийн Ерөнхий сайд Педро Санчес эхнэр Бегонья Гомезынх нь эсрэг мөрдөн шалгах ажиллагаа явуулж байгааг үл харгалзан албан тушаалдаа үлдэхээр төлөвлөж байгаагаа даваа гаригт мэдэгджээ.

Испанийн шүүх Ерөнхий сайдын эхнэр Бегонья Гомезыг авлигын хэргээр шалгаж эхэлсний дараа Ерөнхий сайд Педро Санчес "эхнэрийнхээ нэр төрийг хамгаалж, шүүхийн байгууллагатай хамтран ажиллана" гэдгээ мэдэгдээд хэрэг явдал шийдвэрлэгдэх хүртэл үүрэгт ажлаас түдгэлзэж буйгаа мэдэгдсэн билээ. Гэвч үүнээс хойш тав хоногийн дараа Ерөнхий сайд “Би Испанийн Засгийн газрын тэргүүний албыг үргэлжлүүлэн хашихаар шийдсэн” хэмээн мэдэгдэл хийжээ. Мөн өөрийнх нь болон эхнэрийн эсрэг кампанит ажил явуулж байгаа нь ноцтой хэдий ч энэ нь хамгийн чухал зүйл биш юм гэсэн байна. Ерөнхий сайдын хэлснээр, олон нийтийн болон өөрийн намынх нь дэмжлэг түүнийг шийдвэрээ гаргахад тусалжээ. 

Төрийн албан тушаал хашдаггүй Б.Гомезыг Манос Лимпиас /Цэвэр гар/ гэх хэт барууны байгууллагын хүсэлтийн дагуу авлигын хэргээр мөрдөн шалгах ажиллагаа эхлүүлсэн бөгөөд Ерөнхий сайд эхнэрийнх нь эсрэг мөрдөн шалгах ажиллагаа эхлүүлсэнд сөрөг хүчнийг тэргүүлэгч барууны төвч үзэлт Ардын нам болон хэт барууны үзэлт Vox намтай улс төрийн холбоотой цахим мэдээллийн сайтуудыг буруутгажээ.

Испанийн Ерөнхий сайдын албыг 2018 оноос хойш хашиж байгаа 52 настай П.Санчес өнгөрсөн 11 дүгээр сард дахин томилогдсон юм.

Өнгөрсөн амралтын өдрүүдэд Мадрид болон бусад хотуудад олон мянган хүн П.Санчесыг албан тушаалдаа үлдэхийг дэмжиж жагссан байна. Жагсагчид “Санчес, үргэлжлүүл”, “Бүү бууж өг” гэх зэрэг бичигтэй уриа лоозон барьсан байжээ.