Эрх зүйн шинжлэх ухаанд "Эцэг, эхийнх нь үйлдсэн хэрэгт үр хүүхдийг нь яллаж болохгүй" гэсэн зарчим үйлчилдэг. Үр, хүүхдийн үйлдсэн хэргийн төлөө ч бас эцэг эхийг нь яллахгүй гэсэн үг.

Гэвч АНУ-ын шүүх өчигдөр үүний эсрэг нэгэн шинэ жишиг тогтоов. 2021 онд Мичиган мужийн Оксфорд хотын нэгэн сургуульд зэвсэгт халдлага үйлдэж, дөрвөн сурагчийн амийг хөнөөсөн өсвөр насны хүүхдийн эцэг, эхэд шүүхээс 10-15 жилийн хорих ял сонсгосныг CNN мэдээлсэн байна. 

Окланд дүүргийн шүүхийн шүүгч Шерил Мэттьюс эцэг Жэймс Крамблиг “гэртээ хадгалж байсан галт зэвсэг, буу, сум зэргийг чөлөөтэй ашиглах боломж олгосон”, эх Женнифер Крамблиг “эдгээр зэр зэвсгийг ашиглах, эзэмшихийг сайшаасан, хөхүүлэн дэмжсэн” гэж буруутгажээ. 

Насанд хүрээгүй хүүхдийн үйлдсэн аллагад хэнийг буруутгах талаар удаан үргэлжилсэн маргаан ийнхүү өндөрлөв. Прокурорууд энэ удаа хүүхдийнх нь үйлдсэн хүнд гэмт хэрэгт эцэг эхийг шийтгэх хууль эрх зүйн шинэ жишиг тогтоосон байна.

Хэрэг гарах үед 15 настай байсан Этан Крамбли гэрээсээ авчирсан 9 мм-ийн  Sig Sauer хийцийн галт зэвсгээр Оксфордын Ахлах сургуулийн байранд халдаж, дөрвөн сурагчийн амийг хөнөөж, зургаан сурагчийг нэг багшийн хамт шархдуулсан нь олон нийтийг цочирдуулсан билээ. Эцэг, эх Крамбли нарыг аллагын маргааш баривчилж, хоёр жил гаруй хугацаанд цагдан хорьжээ. Харин Этаныг өнгөрсөн онд хүн амины дөрөв, бусад 19 хэрэгт нь өршөөлд хамрагдах нөхцөлгүйгээр бүх насаар хорих ялаар шийтгэсэн юм.