УИХ-ын гишүүн Л.Мөнхбаатар, Ц.Мөнх-Оргил нар өчигдөр УИХ-ын дарга Г.Занданшатарт "Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай" хуулийн төслийг өргөн барьсан. Уг хуулийн төсөл нь ганцхан заалттай бөгөөд зургадугаар сарын 14-ныг "Шүүхийн өдөр" болгох тухай юм.
Энэ нь "шүүхийн үйл ажиллагааг олон нийтэд сурталчлах, олон нийтэд үнэн зөв, бодит мэдээллийг хүргэх ач холбогдолтой" хэмээн хууль санаачлагчид тайлбарласан.
Гэтэл хуульд шинээр тусгах гэж байгаа "Шүүхийн өдөр" нь Ерөнхийлөгч У.Хүрэлсүхийн төрсөн өдөртэй давхцаж таарсан байна. Ерөнхийлөгч У.Хүрэлсүх 1968 оны зургадугаар сарын 14-нд Улаанбаатар хотод төржээ. Тэгвэл Шүүхийн өдөр, Ерөнхийлөгчийн төрсөн өдөр хоёр санамсаргүй давхцал байж болох уу?