Японы сүмогийн 70 дахь их аварга ёкозүна Харүмафүжи Д.Бямбадорж албан ёсоор зодог тайлсан шалтгаан нь согтууруулах ундаа хэрэглэсэн үедээ Таканоива А.Баасандоржыг өнгөрсөн жил зодож танхайрсан гэх үйлдэлтэй нь холбоотой билээ. Гэвч сүмо бөх сонирхогчдын анхаарлын төвд байсан эл үйл явдлыг Таканоива Баасандорж Харүмафүжи аваргаас 30 сая иен, монгол мөнгөөр 675 сая орчим төгрөг нэхэмжилснээр сэдрээж орхисон. Нэхэмжилсэн төлбөрөө хоёр тэмцээн өнжсөн, сэтгэл санааны хохирол, эмнэлгийн болон замын зардал хэмээн тайлбарласан нь олон хүний дургүйцлийг хүргээд авсан юм.
Энэ үйл явдлыг намжаахаар Кёкүшюзан Д.Батбаяр хүртэл “Харүмафүжигийн өмнөөс Таканоивагийн нэхэмжилсэн мөнгийг нь төлье” хэмээн Японы хэвлэлд ярилцлага өгсөн удаатай.
Тэгвэл энэ асуудал өнөөдрөөр дуусгавар болж байгаа аж. Таканоива Баасандорж Харүмафүжи аваргын эсрэг гаргасан мөнгөн нэхэмжлэлээ татаж авчээ.
Таканоива “Энэ нэхэмжлэлээс болоод Монголд маш их шүүмжлүүлсэн тул татаж авахаар шийдсэн. Гэрбүлийнхэн маань ч их хэлүүллээ. Монголд байгаа гэрийнхэн маань “Тэсэхээ байлаа. Гомдлоо буцааж ав” гэж хүртэл хэлсэн. Би эцсээ хүртэл явах бодолтой байсан ч гэр бүлээ ийм байдалд оруулж чадахгүй. Цаашдаа нэхэмжлэл гаргахгүй, эмчилгээний зардалаа ч өөрөө төлнө. Монголчууддаа намайг болон манай гэрбүлийнхнийг ойлгож, зөвөөр хандана гэж найдаж байна” гэж сэтгүүлчдэд тайлбарласан байна.
Сэтгэгдэл (4)