Баянзүрх дүүргийн “Олимп” хотхоны хойд замд, аравдугаар сарын 10-ны өдөр "Ланд-200" маркийн авто машин эсрэг урсгалаас орж долоон авто машин мөргөж, 12 настай хоёр хүүхдийг дайрсан хэрэг гарсан. Энэ талаар ТЦА-ны хэвлэл мэдээлэл, олон нийттэй харилцах  төвийн дарга Г.Отгонтамир мэдээлэл өглөө.

Тэрээр “Дайруулсан хоёр хүүхэд эрүүл мэндийн байгууллагын хяналтад байгаа. Бид тухайн осолд шалгалт хийж байна. Шалгалтын ажил дуусаагүй байгаа. Осол гаргасан жолоочийг тухайн үед шалгахад архи согтууруулах ундаа хэрэглээгүй байсан. Мөн мансууруулах бодис хэрэглэсэн эсэхийг тест хийхэд мөн хэрэглээгүй гэж гарсан. Нарийвчлан тогтоохоор түүний биеэс биологийн дээж болгон цус авч, Шүүхийн шинжилгээний хүрээлэнд шинжээч томилсон.

Явган зорчигчийн эрүүл мэндэд учирсан хохирлыг тогтоохоор шинжээч томилсон, дүгнэлт гараагүй байна. Жолоо барьж явсан иргэн жолооч биш байсан. Иймд авто машинаа жолооны эрхгүй иргэнд шилжүүлсэн хүнд давхар хариуцлага тооцно” гэлээ.

Тус ослыг үйлдсэн жолооч нь 1993 онд төрсөн, эмэгтэй бөгөөд энэ оны 10 дугаар сарын 10-ны орой 18:00 цагийн орчимд найз залуу болох “Б”-г согтуугаар автомашин жолоодуулахгүй байх зорилгоор түүний төрсөн ахын эзэмшлийн "Toyota Land Cruiser" маркийн тээврийн хэрэгслийг жолоодож явахдаа дээрх ослыг гаргасан байна.