УИХ-ын түр хороо хуралдаж байна.

Энэ үеэр гишүүд асуулт асууж, хариулт авч байна. 

УИХ-ын гишүүн Б.Жавхлан "Сэлэнгэ аймгийн нутагт самранд яваад ууланд хоригдсон 2,000 гаруй иргэн байна. Энд монгол орны өнцөг булан бүрээс тэнд иргэд байгаа. Улаанбаатарын ч иргэд бий. Иргэд маань ууланд маш хүнд байдалд байна. Дархан-Уул аймгийн 200 орчим иргэн Сэлэнгэд байгаа гэсэн тоог гаргасан. Эдгээр иргэдийг газар дээр нь шинжилгээ аваад, гэрт нь авчрах боломж байгаа юу" хэмээн асуулаа.

Харин Шадар сайд Я.Содбаатар "21 аймгаас энэ жил 7,497 хүн самранд явсан байна. Овог нэрээрээ цагдаагийн байгууллага дээр бүртгэлтэй байгаа. Өнөөдрийн байдлаар Сэлэнгэ аймгийн Мандал сумын нутагт 1,600 орчим хүн, Сэлэнгэ аймгийн Хүдэр сумын нутагт 682 хүн уулнаас бууж ирсэн байна. Өнөөдрөөс түргэвчилсэн шинжилгээ хийгээд эдгээр иргэнийг Улаанбаатар хот болон аймгууд руу явуулж байгаа. Улаанбаатар хот руу вагоноор 600 гаруй иргэн өнөөдөр орой орж ирнэ. Энд авчраад тодорхой байршилд тухайн хүмүүсийн шинжилгээг авна. Дархан-Уул, Сэлэнгэ аймгийн тухайд ч бас хуваариуд гарсан" гэлээ.