Хар тамхи хэрэглэсэн хэргээр саатуулагдаад байсан “Мотив” хамтлагийн дуучин Б.Эрдэнэбаярт өчигдөр шүүхээс оргон зайлахыг оролджээ. 

Нийслэлийн Прокурорын газрын Хяналтын прокурор түүнд Эрүүгийн хуулийн тусгай ангийн 20.7 дугаар зүйлийн 1 дэх хэсэгт заасан гэмт хэрэгт холбогдуулан Монгол Улсын хилээр гарахыг хязгаарлах, хязгаарлалт тогтоох таслан сэргийлэх арга хэмжээ авахуулах саналтайгаар Баянгол дүүргийн Эрүүгийн хэргийн анхан шатны шүүхэд шилжүүлж, өчигдөр буюу 2019 оны арванхоёрдугаар сарын 17-ний өдөр шүүх хянан хэлэлцсэн байна. 

Шүүх Б.Эрдэнэбаярт Монгол Улсын хилээр гарахыг хязгаарлах, хязгаарлалт тогтоох таслан сэргийлэх арга хэмжээ авч шийдвэрлэсэн боловч тэрээр цагдан хорионы шүүх хуралд орох гэж байхдаа гавтайгаа зугтжээ. 

Цагдаагийн алба хаагчид түүнийг шөнийн 02.00 цагийн орчимд баривчилсан бөгөөд ингэснээр түүнд шүүхээс оргон зайлахыг завдсан гэх зүйл анги нэмэгдээд байна. Өмнө нь түүнийг мансууруулах эм, сэтгэцэд нөлөөт бодисыг бусдад зарж борлуулах гэж байсан буюу биедээ авч явсан гэх үндэслэлээр эрүүгийн хэрэг үүсгэн шалгаж байв.