УИХ-ын дарга Д.Амарбаясгалан, УИХ-ын даргын дэргэдэх зөвлөлийн бүрэлдэхүүн өнөөдөр Санхүүгийн зохицуулах хороонд ажиллаж, тус байгууллагын хэрэгжүүлж буй бодлого, арга хэмжээнүүдтэй газар дээр нь танилцлаа. Энэ нь УИХ-ын намрын чуулганаар тус хорооны дарга болон орон тооны бус гишүүдийг томилж, хэрэглээний зээлийн хүүг бууруулах талаар өгсөн үүрэг чиглэлийн хэрэгжилттэй холбогдож буй юм.

Санхүүгийн зохицуулах хорооны дарга Т.Жамбаажамцын танилцуулснаар тус хороо нь захиргааны хэм хэмжээний 79 актыг 35 болгож бууруулсан нь журам, заавар нэрийн дор иргэд, аж ахуйн нэгжид учирч байсан дарамтыг багасгаж буй нэг хэлбэр аж. Түүнчлэн 33 тусгай, 26 энгийн зөвшөөрлийг олгож ирсэн практикийг өөрчилж, тусгай зөвшөөрлийг 30, энгийг 15 болгон бууруулах талаар хуулийн төсөл боловсруулан Засгийн газрын Хэрэг эрхлэх газарт хүргүүлээд байгаа юм.

Өнөөдрийн байдлаар Монгол Улсад нийт 573 банк бус санхүүгийн байгууллага (ББСБ) үйл ажиллагаа явуулж, 2 сая 300 мянга гаруй зээлдэгчтэй болсон байна. Тэдгээр зээлдэгчдийн 75 хувь нь цахимаар зээл авдаг бөгөөд энэ нь зээлийн хүү өндөр байх нэг шалтгаан болж байгаа аж. Түүнчлэн 77 ББСБ нь арилжааны банкуудаас нийт 622 тэрбум төгрөгийн зээл авсан нь эх үүсвэрийн өртөг өндөр байхад нөлөөлж, хэрэглээний зээлийн хүүг нэмэгдүүлж буйг дурдсан юм.

Энэ хүрээнд 2025 оны гуравдугаар сарын 20-ноос эхлэн Санхүүгийн зохицуулах хороо ББСБ-ууд арилжааны банкаас зээл авахыг хориглож, оронд нь гадаадын санхүүгийн байгууллагаас эх үүсвэр татах эрх нээсэн байна. Үүнтэй зэрэгцэн зээл олголтын өр-орлогын харьцааг 60:40 байхаар тогтоож, хэт өрийн дарамт үүсэхээс сэргийлэх зорилгоор шалгуур чангатгажээ.

Мөн мөнгөн зээл олгодог иргэн, хуулийн этгээдийг бүртгэх журмыг нэвтрүүлж, хэрэглэгчийн эрх ашгийг хамгаалах зорилгоор сарын хүүгийн дээд хязгаарыг 4.5 хувь болгосон талаар Санхүүгийн зохицуулах хороо мэдээлсэн байна.

УИХ-ын зүгээс энэхүү зохицуулалтыг иргэдийн санхүүгийн ачааллыг бууруулах, зээлийн үйлчилгээний хүртээмж, шударга байдлыг сайжруулах чухал алхам хэмээн үзэж байгаа юм.

Эх сурвалж: УИХ-ын Хэвлэл мэдээллийн газар