Монгол улсад өнөөдрийн байдлаар шинэ төрлийн коронавирусийн халдварын  10 тохиолдол бүртгэгдээд байна.

Дэлхийн 185 гаруй оронд тархаж 70 гаруй хувь нь Европт бүртгэгдэж, зөвхөн Европ тивд 6000 мянган гаруй хүн нас бараад байгаа юм.

Улсын онцгой комиссоос гадаад улсад байгаа иргэдээ тусгай үүргийн нислэг үйлдэж иргэдээ татаж авах ажлыг эхлүүлж, өнөөдрийн байдлаар 1951 хүн тусгаарлалтад буюу ажиглалтад байна. Мөн Баян-Өлгий, Дархан-Уул аймагт тусгаарлах хүний тоо нэмэгдэж байгаа юм.

Харин энэ сарын 19-ны өдөр АН-ын УИХ дахь зөвлөлөөс ерөхий сайд У.Хүрэлсүхэд үүсээд буй нөхцөл байдал, эдийн засгийг хамгаалах тусгай хөтөлбөр боловсруулахыг шаардаж, шаардлага хүргүүлсэн.

Энэ үеэр АН-ын дарга, УИХ-ын гишүүн С.Эрдэнэ “Гадаадаас монголчуудаа оруулж ирэхдээ аюулгүй байдлыг бүрэн хангаж чадаж байгаа юу, цар тахлыг тараахгүй байх бэлтгэл бий юу гэдэг эргэлзээтэй байна.  Цар тахлын аюулыг гадаадаас импортолж оруулж ирж байгаад санал нэгдэхгүй байна” гэж мэдэгдсэн билээ.

Энэ талаар товч.мн сайт АН-ын ҮБХ-ны гишүүн М.Чимэддоржоос Гадаадад байгаа Монгол иргэдийг авч ирэх нь зөв эсэх, мөн намын даргын байр суурийн талаар тодруулга авчээ. Тодруулгыг бүрэн эхээр хүргэж байна.

М.Чимэддорж: “Нэг зүйлийг маш тодорхой хэлье. Дэлхийн 60 гаруй улс орон хилээ хаасан байна. Гадаадаас, ялангуяа вирусийн тархалт өндөртэй улс орнуудаас зорчигчдыг хүлээж авахгүй гэсэн мэдэгдэл гаргасан. Гэхдээ өөрийн улсын иргэдээ хүлээж авахгүй гэж мэдэгдсэн нэг улс байхгүй байна. Эх оронтой байна гэдэг ямар ч үед эр орондоо буцаад ирэх эрхтэй хүмүүсийг хэлж байгаа юм. Зөвхөн өвчин бус дайны голомтод байгаа иргэдийг аль ч улс орноос татаж авдаг.  

Төр оршин байгаа утга, учир нь энэ. Төрийн үүрэг нь иргэдээ хамгаалах, эх оронд нь авч ирэх юм. Жишээ нь АНУ гадаад улс орноос ирж байгаа бүх нислэгээ цуцалсан. Гэхдээ хугацаа өгөөд улсынхаа иргэдийг эх орондоо ирээч гэсэн. Дахиж нислэг зохион байгуулах төвөгтөй байгаа учир хугацаа өгсөн. БНХАУ-д сүүлийн 14хоног аяласан иргэнийг хүлээж авахгүй гэж мэдэгдсэн. Энэ нь зөвхөн өөрийн улсын иргэн биш байсан юм.

Гэтэл манай АН-ын даргын гаргасан болчимгүй мэдэгдэл маш буруу. Мөн цахим орчинд ч иргэд буруу, зөв гэж хоёр хуваагдаж байна. Зарим нь Монголчуудаа бодох хэрэгтэй, хилийн гадна гараад явсан иргэд ямар хамаатай юм бэ гэж байна. Энэ бол буруу. Төр байгаа л бол өөрийн иргэдийг ямарч тохиолдолд хамгаалах нь зөв.

Нэгдүгээрт, Монгол улсын Үндсэн хуульд “Монгол улсын иргэн дараах бүрэн эрхийг баталгаатай эдэлнэ. Үүн дотор, улсынхаа нутаг дэвсгэрт чөлөөтэй зорчих, түр буюу байнга оршин суух газраа өөрөө сонгох, гадаадад явах, оршин суух, эх орондоо буцаж ирэх эрхтэй” гэж заасан. Энэ бол эх оронтой хүний язгуур эрх.

Хоёрдугаарт, Хэрвээ хязгаарлах бол хууль баталж байж хязгаарладаг. Монгол улсын нутаг дэвсгэрт хүчин төгөлдөр мөрдөгдөж байгаа ямар ч хуулинд “Монгол улсын иргэнийг эх орондоо ирэхийг нь хориглосон” ямар ч хууль байхгүй.

Гуравдугаарт, Ардчилсан намын суурь зарчим нь хүний эрх, хүний эрхийг хамгаална, хамгаалах ёстой, хүний эрхийг хамгаалахад гарч буй төрөөс үзүүлж байгаа зарим нэгэн хязгаарлалтууд байвал анхаарч байх ёстой. Энэ бол АН-ын үүрэг.

Гэтэл намын даргын хийсэн болчимгүй мэдэгдэл нь үндсэн хуулийн эсрэг, мөн АН-ын үзэл баримтлалын эсрэг ярьж байгаа юм. Байж боломгүй, хэзээ ч хүлээн зөвшөөрч болохгүй үйлдэл болж байгаа юм. Энэ мэдэгдлийнхээ төлөө АН дарга С.Эрдэнэ монголын ард түмнээс уйлчлал гуйх ёстой.

АН-ын гишүүд бүгд ингэж бодож байгаа хэрэг биш, энэ бол зөвхөн АН даргын байр суурь. Олон гишүүд энэ мэдэгдлийн эсрэг байгаа.

АН-ын даргын мэдэгдэлд “5, 10-хан хүний амь”-ийг аврахын тулд гэж мэдэгдэж байна. Энэ үг нь түүнийг намын даргын ажлаа өгөх ёстой гэж бодож байна.

Нөгөө тал байгаа асуудал нь, төр иргэдээ авчрах ёстой, мөн монголын нутаг дэвсгэрт халдвар тархаахгүй байж иргэдээ хамгаалах үүрэгтэй.

Харамсалтай нь гадаадаас иргэдээ авчирч буй үйл ажиллагаанд том алдаа байна. Иргэдийг халдвар авсан эсэхийг ирэхээс нь өмнө шинжилгээ хийгээд тогтоох боломжтой. Гэтэл эрүүл хүмүүсээ вирусийн халдвар тээсэн хүнтэй хамт авч ирлээ.

Иргэдээ тухайн байгаа улс оронд нь шинжилгээ авч тухайн газар нь 14 хоног тусгаарлах боломжтой. Тухайн улстай нь ярилцаад шийдэж болох асуудал байсан. Халдвар авсан иргэдээ тэнд нь эмчлэх боломжтой байсан. Одоо цаашид ингээд ажиллах бүрэн боломжтой гэж харж байна” гэлээ.