Нийслэлийн прокурорын газар, ЦЕГ-ын Тусгай ажиллагааны газар, Эрэлч нохойн алба хамтран энэ сарын 14-15-нд Мансууруулах эм, сэтгэцэд нөлөөт бодистой холбоотой гэмт хэрэгтэй тэмцэх хууль тогтоомжийн хэрэгжилтийг хангах, хууль бус хэрэглээг хязгаарлах, далд хэрэглэгчдийг илрүүлэх зорилгоор Нийслэлийн дүүргүүд дэх цагдаагийн хэлтсүүдтэй хамтран шөнийн цэнгээний газар буюу шөнийн клубуудэд хяналт, шалгалтыг зохион байгуулжээ.
Шалгалтаар 40 иргэнийг хар тамхи илрүүлэгч тестээр шалгахад зургаан хүнээс хар тамхи илэрчээ. Тиймээс тухайн иргэдэд холбогдох хэргийг хуулийн байгууллагынхан үргэлжлүүлэн шалгаж байгаа юм байна.
Мөн гэмт хэргийн шинжтэй нэг үйлдэлд хэрэг бүртгэлийн хэрэг нээж, холбогдох шалгалтын ажиллагааг явуулж байна.
Энэ оны эхний таван сарын байдлаар хар тамхитай холбоотой 96 гэмт хэрэгт 188 хүн холбогдоод байгаа юм. Тухайлбал, энэ оны тавдугаар сарын 19-ны өдөр Дорноговь аймгийн Замын-Үүд дэх авто замын хилийн боомтоор сэтгэцэд нөлөөт “мөс” гэгч бодисыг БНХАУ-аас хууль бусаар нэвтрүүлэн тээвэрлэснийг илрүүлж, эрүүгийн хэрэг үүсгэн шалгаж байна.