Ирэх зургадугаар сард Японы Осака хотноо “Их 20”-ийн дээд хэмжээний уулзалтыг зохион байгуулах гэж буйтай холбогдуулан тус улсын Ерөнхий сайд Шинзо Абэ Европ болон Хойд Америкийн орнуудад айлчилхаар болжээ.
Шинзо Абэ Франц, Итали, Словак, Бельги, АНУ, Канадад айлчилж, тэдгээр орны удирдагчидтай уулзах аж. Тэрээр өнөөдөр айлчиллаа эхлүүлж байгаа юм байна.
Шинзо Абэ Францын Ерөнхийлөгч Эмманюэль Макронтой уулзах үеэрээ гал түймэрт сүйдсэн Парисын Дарь эхийн сүмийг сэргээн засварлах ажилд дэмжлэг үзүүлэхийг санал болгох төлөвлөгөөтэй байгаа бөгөөд тэд “Их 20”-ийн дээд хэмжээний уулзалтын үеэр хэлэлцэх асуудлын талаар хэлэлцэх юм байна.
Харин АНУ-ын Ерөнхийлөгч Дональд Трамптай хийх уулзалтын үеэр, БНАСАУ-ыг цөмийн зэвсгээс ангижруулах чиглэлд хамтын ажиллагаагаа үргэлжлүүлэх хүсэлтэй байгаагаа илэрхийлэх ажээ. Хоёр орны удирдагчид мөн өнгөрсөн долоо хоногт эхэлсэн Япон-АНУ-ын худалдааны хэлэлцээний шинэ үе шатыг хэрхэн үргэлжлүүлэх талаар хэлэлцэх төлөвтэй байна.
АНУ-ын ерөнхийлөгч Доналд Трамп ирэх тавдугаар сард Японд айлчлахаар төлөвлөж байгаа нь тус улсын шинэ эзэн хаантай уулзах анхны гадаад орны удирдагч болох аж. Мөн АНУ-ын ерөнхийлөгч ирэх зургадугаар сард Осака хотноо болох “Их 20”-ийн уулзалтад оролцоно. Ингэснээр Шинзо.Абэ, Доналд Трамп нар гурван сарын хугацаанд гурван удаа уулзах юм байна.