Хорватын хагас хамгаалагч Лука Модрич шигшээ багийнхаа бүрэлдэхүүнд 200 тоглолтод оролцсон дөрөв дэх хөлбөмбөгчин боллоо. Тэрбээр 2026 оны дэлхийн аварга шалгаруулах тэмцээний (ДАШТ) хэсгийн шатны хоёрдугаар тойрогт Панамын шигшээ багтай хийсэн тоглолтод гарааны бүрэлдэхүүнд талбайд гарчээ.

Энэхүү үзүүлэлтээр Л.Модричийн өмнө Португалын довтлогч Криштиану Роналду (230), Кувейтийн хөлбөмбөгчийн Бадер аль-Мутава (202), Аргентины довтлогч Лионель Месси (201) нар бичигдэж байна.

Канадын Торонто хотод болсон тоглолтод Хорватын шигшээ баг Панамын багийг 1:0-ээр хожсон байна. Тоглолтын цорын ганц гоолыг Анте Будимир 54 дэх минутад хийжээ.

Өдгөө 40 настай Л.Модрич 2025 оны долоодугаар сараас эхлэн Италийн "Милан" клубт тоглож байгаа юм. Үүнээс өмнө 2012 оны зунаас хойш Испанийн "Реал Мадрид" клубийн тоглогч байсан бөгөөд тус багийн бүрэлдэхүүнд Аваргуудын лигт 6 удаа, Клубүүдийн ДАШТ-д 5 удаа, Испанийн аварга шалгаруулах тэмцээнд (Ла Лига) 4 удаа, тус улсын Цомын тэмцээнд 2 удаа, Супер цомын тэмцээнд 5 удаа тус тус түрүүлсэн билээ. Тэрбээр 2018 онд "Алтан бөмбөг" (Ballon d'Or) шагналыг хүртсэн юм. Мөн Английн "Тоттенхэм", Загребын "Динамо" клубүүдэд тоглож байв.

ДАШТ-ий мөнгө, хүрэл медальт Л.Модричийн хувьд 2026 оны ДАШТ нь тав дахь тэмцээн юм. ДАШТ-ий талбайд зургаан удаа гарсан амжилтыг Роналду, Месси нар эзэмшиж байна.

Эх сурвалж: TASS