Замын-Үүд сумын Засаг даргын ивээл дор Монголын Зохиолчдын “Хурмаст тэнгэр” төвөөс хамтран зохион байгуулсан “Борхойн цом-2026” яруу найргийн 15 дахь удаагийн наадам 2026 оны 5 дугаар сарын 25-ны өдөр Замын-Үүд сумын Соёлын ордонд боллоо.

Тус наадамд 60 гаруй яруу найрагч бүтээлээ ирүүлснээс хоёрдугаар шатанд шалгарсан 22 найрагч оролцож, Замын-Үүд сумын хөгжил дэвшил, бүтээн байгуулалт, байгаль орчин, иргэдийн ажил хөдөлмөрийг харуулсан шүлэг бүтээлээ толилуулав. Шүүгчдийн нэгдсэн дүнгээр:

Тэргүүн байрт: МЗЭ-ийн шагналт яруу найрагч Э.Анхбаяр,

Дэд байрт: Дундговь аймгийн харьяат яруу найрагч Д.Энхбаяр,

Гутгаар байрт: Монголын Зохиолчдын “ХУРМАСТ ТЭНГЭР” төвийн гишүүн яруу найрагч А.Уранжаргал,

Тусгай байрт: Өмнөговь аймгийн харьяат Г.Сэр-Одын шагналт яруу найрагч Т.Батхүрэл, Монголын Зохиолчдын “ХУРМАСТ ТЭНГЭР” төвийн гишүүн яруу найрагч Г.Ган-Эрдэнэ нар тус тус шалгарлаа.

“Борхойн цом” наадам нь орон нутгийн утга зохиолын үйл ажиллагааг дэмжих, яруу найрагчдын бүтээл туурвилыг олон нийтэд хүргэх, шинэ уран бүтээлчдийг нээн илрүүлэх зорилготой.

Сонирхуулахад, Замын-Үүд суманд “Борхойн цом” яруу найргийн наадмыг тэртээ 1981 онд анхлан зохион байгуулж, Монгол Улсын Соёлын Гавьяат зүтгэлтэн, яруу найрагч Р.Батжаргал, МЗЭ-ийн шагналт яруу найрагч Л.Содномдорж, МЗЭ-ийн шагналт яруу найрагч Т.Дашбалдан, яруу найрагч Ю.Идэрчулуун нар оролцож байжээ. Энэхүү наадам 45 дахь жилдээ ийнхүү өргөн дэлгэр боллоо.